Australian mithiam te pawl in Vitamin A in dimhnak banhla ci thar bawn suak

Australian mithiam te pawl in Vitamin A in dimhnak banhla ci thar bawn suak

banhla2020 kum ah genetic engineering hmangin bawnhnak Vitamin A in dimhnak banhla heh Africa ram ai vitamin sam minung million tam roh te nuncakhnak tuhin hmang pan tuh thu Australia mithiam te pawl in phuang ii. He thilthar heh Queensland University of Technoloty (QUT) in bawn ai Melinda Gates Foundation in sumsaw in bawm ii.

Laboratory ah bawn cophnak banhla ci danglam ah alpha le beta carotene te tel ai cia te pawl heh minung song ah vitamin A ah cang de ii. Laboratory ina banhla ci thar a bawnhnak heh 2020 kum ah Africa ram ai Uganda ram ah ciing pan tuh ii. Zarh ruk song he banhla ai lekhaw minung ah vitamin A niamhnak saang kio tuh ii.

Australia in bawnhnak banhla thar heh tun United State ah kuat zo ai a kulhnak te zingzoi beet tuh ii.

Banhla heh rong i fawm ai minung ah vitamin A tam ruai tuh i maanin thil remcang ngaiin mithiam te in ruathnak ii. Tun ai banhla thar heh a pua lam in siik lekhaw banhla dang thawn danglamhnak umh lo napui a song lam tu a aaire thah ii.

 Laivum ah vitamin A sam maanin naupang 650,000 – 700,000 te kum siar thi tio ii. Cen vitamin A sam maanin kum siar a tlawm ber ah mi 300,000 ai mi hnawm de thu QUT ai professor James Dale in reel ii.

Hetin banhla ah a kuulhnak te bawn in banhla ci danglam bawn suak hnak in rong thar i fawm, vitamin A ngah hnak i tuh maanin thil remcang ngaiin mithiam te in reel ii. He rong thar in laivum ai ram harsa ai vitamin sam te ca thil pha le remcang ngai i tuh ti ii.

Uganda ah he banhla thar ciing siang lekhaw he thiamhnak thar hmang in Rwanda, Democratic Republic of Congo, Kenya le Tanzania ram te bang ram dang dang ah ciing vivo tuh ii.

Banhla heh thingthai bangin ai thil le rong in sual thil pah ii. Cen equator ram te pawl ah banhla pha thai ngai ii. Ciamaanin tun bangin banhla thar heh rong ai pha harsa hmun ram ah banhla ciing in vitamin A in harsahnak te tlawm sin tuhin ruathnak ii.

Only registered users can comment.