• Salai Tluang Kip Thang: Ram Ukhnak (Political System)

Salai Tluang Kip Thang: Ram Ukhnak (Political System)

Ram ukhnak politics rel fangin mi tam sawn in Communists heh kehlam ber pawl (far Left), Fascists heh vorhlam ber pawl (far Right) le a karlak heh tuakteng, roh ze lo pawl (Moderate) in hmu de ing. Ciamaan Moderate heh a pha ber in lang de ii.

Ram politics thula rel fangin a remcang ber tu thunaihnak (power) hmangin a tlawm ber an tam ber in rel pha ii. Vorhlam ber heh thunaihnak ‘0%’ i selai, Kehlam ber heh thunaihnak ‘100%’ i selai; thunaihnak ‘0%’ umhnak ram ah acozah le thunaitu umh lo ii. Thunaihnak ‘100%’ tu acozah i hlah lekhaw konghoitu in thunaihnak veksen a kut ah umh ii le cia bang ram heh Communism, Socialism, Nazism, Fascism, Dictator tebangin rel de ii. Ciabang thunaihnak ‘100%’ le ‘0%’ karlak heh mipui ai kuulhnak kilkhawldunhnak thunaihnak in rel de le ciabang thunaihnak heh Constitutional Moderate ti ii.

Hetin ram le mipui vumah thunakhnak le kilkhawlhnak heh hetin a tlangpui in rel thil ii. Thunaihnak tam ber an thunaihnak tlawm berin rel fangin:

1) Monarchy/Dictatorship (mi pakhat in ukhnak)
2) Oligarchy (mi hrekkhat in ukhnak)
3) Democracy (mi tam sawn daihdan in ukhnak)
4) Republic (daan hmangin ukhnak)
5) Anarchy (thunaitu umh lo ukhnak)

governments

Monarchy (mi pakhat in ukhnak):

Hebang heh takin umh ngaingai lo ii. Zaimaan ti fangin amahte konghoitu tuhin pawl pakhat khat in amahte daihnak mi pakhat heh a vum ah umh ruai de hnak ukhnak ii. Siangpahrang i lekhaw amah thawn thu relpuitu le thu relcat sahtu rinsanhnak le pawl nai ii. Cen, Dictator i lekhaw a hnua lam in amah nortu le thu relcat sahtu pawl heh a hnua lam ah umh hlen ii. Hebang uknak heh a pua lam in siik fangin mi pakhat in ukhnak baang napui a hnua lam in mi tlawmniu thunai pawl in ruaihnak bangin fehhnak ukhnak ii. He maanin mi pakhat rori in konghoihnak ngaingai heh umh ngaingai lo ii.

Oligarchy (mi hrekkhat in ukhnak):

Tluanthu sik fangin he ukhnak heh a tam ber ii. Cia heh tunah khai laivum in a hmang berhnak ukhnak ii. A tlangpui in thunaitu le mithiam tlawmniu pawl ai thu in konghoihnak ukhnak ii.

Anarchy (thunaitu umh lo ukhnak):

He ukhnak ah acozah/government umh lo ii. Hebang heh tluanthu ah siik fangin acozah in mipui harsa ruai ze maanin mipui in acozah nai lo, acozah umh lo heh a pha sawnin ruathnak umh de ii. Ciabang fangin mipui in amahte uktu acozah i hlah lekhaw siangpahrang tebang khiah lon de ai, uktu nai lo ram in cang de ii. Hebang uktu ngaingai umh lo hnak heh a pha i lo ii.

Greek miphun thufim ah daan umh lovin zalenhnak umh thil lo (without law, there can be no freedom) ti ii. Hetih bang maanin ram le mipui hrang daan thawn thunaihnak zaimawzah naihnak ukhnak umh kuul in hnuata lamah ruathnak umh ii.

Anarchy ram dinhmun ah mi veksen in amahte lala kilkhawl kuul ai, mi veksen in ralthuam nai kuul in suak ii. Hebang ram dinhmun ah zalen ngaiin tlangleng thil lo ai, mi in a thilnaihnak heh midang in sut sah tuh lovin kil ngio kuulin umh le mipui veksen in ralthuam nai sio kuul in cang ii. Cetih bang maanin misual le raal lakah humhimtu tuhin a ce in mi hrekkhat heh ralthuam thawn umh kuul ai, hrekkhat tu naper kuul in umh ii. Hetin ralthuam thawn mipui humhimtu pawl umh fangin mipui heh zalen ngaiin tlangleng thil ai naper thil in umh ii.

Hrekkhat in amahte dinhmun lungkhim lo ai uktu daih lo maanin Anarchy pha in fehpui de ii. Anarchy cang fangin uktu umh lo ai, daan umh lo maanin zai khai umh lo bang i maanin cia hmun ah thildang lut bai niu ii. Anarchy fangin aisu khai kihzahdunhnak umh lo ai, khat le khat tawngdunhnak le thil sut sah dunhnakin cang kio de ii. Hetih fangin amahte hnakin thi ti thai le cak deuh te hnen ah feh le, thunaihnak pe de ii. Hetin buaihnak com leh de ii. Hebang heh Anarchy umh tuhin buaihnak bawntute thotho in hnuata ah mipui vumah thunaitu le uktu ah cang leh de ii. Anarchy pawl in buaihnak umh ruai ai, amahte thotho in hnuata ah buaihnak bo ruai ai, amahte heh thunaitu le uktu ah cang leh de ii.

Anarchy hmangin Olicharcy cang de ii. Russia ram ah canghnak Lenin in ram thunaihnak a ngahdan le Germany in Hitler lam tang pawl in ram buai ruai awng ai, Hitler in thunaihnak nai kio awng bang ii. Anarchy heh ukhnak pakhat le pakhat karlak ai camkhat dinhmun ii.

Democracy (mitam sawn daihdaan in ukhnak):

Democracy heh Greek pongfang ai Demos = mipui (people) le Kratein = uk (to rule) in kawihnak ii. Ciamaan Democracy tihnak tu mipui in ukhnak i hlah lekhaw mitam sawn daihdan in ukhnak tihnak ii. He ukhnak heh pha baang napui santehhnak in mi tam sawn in mi hrekkhat ai thil naihnak le mite siatsuah sio daih selai a pha cuang fawn lo ii. Democracy hmangin mi in mipui hrekkhat hnakin tam sawn heh amahte daihnak lungkhim ruai in thil hnawmcan ruai thil hlen ii.

Republic (Daan hmangin ukhnak)

He ukhnak heh Latin pong ai Res = thil/naihnak (thing) le Publica = rammi/mi seenpui (public) an kawihnak ii. Hetin Republic tihnak tu mipui ai thil relhnak ii ai, mipui ca ukhnak daan, upadi relhnak ii. Republic ngaingai tu uktu acozah heh daan hmangin a thuhnaihnak heh a tawpkhumhnak, riteek nai ruai ai, mipui heh a ce in umh ruai ii. Democracy ram lar ber America ram khiah a ram dinhnak le zalenhnak laai Declaration of Independence ah Democracy tihnak laai nganhnak umh lo ai, U.S ai daanhampui (constitution) ah khai Democracy tihnak lai nganhnak umh lo ii. Ram khan (State) 50 ai daan a naihnak songah khai Democracy tihnak pongfang nganhnak umh cuang lo ii. America ai Declaration of Independence lai ah hming khentu Samuel Adams in “Democracy heh a rai nung thil lo ii. Bohnak, cawlhnak le reedunhnak in zom de ii” (Democracy never lasts long. It soon wastes, exhausts and murders itself) tiin rel ii. A ngom ah George Washington heh siangpahrang i tuhin daihtu umh ve ii. Inapui hlanlai ai Greece ram ai Democracy hmangin thil thil canghnak a phahnak le pha lo hnak thawn, America ram din fangin amahte song ai thil canghnak phuncang siikin, America ram ukhnak daan a bawn fangin phantak ngaiin ruatin, Democracy ian in cang thil lo tihnak a fiang maanin laai ah Democracy tiin ngaan tengteng lovin hmang ii.

Democracy ukhnak hampanhnak Greece ram khiah ram ukhnak thula ah mipui veksen in buaihnak (mob rule) hleng tio ai, cia ben ah Anarchy hleng le hnuata ber ah Olicharcy ukhnak ah lut tio de ii. Cia san ah Greekmi songin Solon tihnak thuruat thiam ngai pakhat in ram ukhnak daan fumfe nai kuul thu rel de napui Greek mipui in pom sah lo ii. Inapui, Greeks pawl in sang hiam lo hnak Solon ai relhnak heh Rome san hleng fangin Roman miphun pawl in hmang sah ii. Solon ai relhnak bangin Rome Ukhnakdaan tihnak lung per 12 vum ah Rome Ukhnak Daanhampui ngaan sio awng ii. Hetin Rome san ah Democracy hmangin Republic ukhnak din suak ii. Hetin Rome ram ding ngom fangin uktu pawl in thunaihnak heh ramri nai in bawn sah le, mipui heh uktu pawl lakin zalen ngaiin umh thil awng ai, a ram khangso roh awng ii. Rome a khangso roh fangin hnuata lam ah mipui zalenhnak heh acozah in thunaihnak veksen nai pha lo tihnak hai kio awng ii. Hnuata lamah thunai hiam pawl in ukhnak daan song ah acozah in thunaihnak tam aamaam tuhin daan thar tel ruai vivo ii. Hetin uktu acozah in thunaihnak sang tete ai, mipui in zalenhnak nai lo tete in cang kio ii. Hetin hnuata lam ah mi hrekkhat thunaitu pawl songin ramdaan ukhnak heh lang kio awng ai Republic dinhmun an Democracy ah cang kio ai, cetan Oligarchy ukhnak Caesar hnia ah tlok leh awng ii.

Ciamaan Democracy ianin ram ukhnak hnget kho thil lo ai, Democracy an Oligarcy ah cang baai niu ii.

Ref:
Political System 101:  Basic Forms of Government Explained
Overview of America by John Birch Society video

 

Only registered users can comment.