Zu ding le sikhaw Cancer in na thi tuh

Zu ding le sikhaw Cancer in na thi tuh

cancer
Zu heh English in Alcohol tiin mi tam sawn in ling ii sing. Ikhalkhaw Alcohol ian Zu i lo ai, Ethanol khai Zu pah ii.

Beer 12 ounces (355 ml), Wine 5 ounces (150 ml) le Zu 40% alcohol 1.5 onces (80-proof liquor tiin ko pah) ah bangran in Ethanol 1 ounce (30 ml) tel ii. Zu tak sawn ah he hnak in tam sawn Ethanol tel tuh ii. US ram ai Khuat khat (1 Cup) heh 236.6 ml ii.

Cancer tihnak zei ii?


Cancer tihnak tu minung tiksa song ai cell te pawl com tih nia nai loin pung tento, zaai tento hnak ii. Cell heh a thi caan umh ai, a hni fangin cell nung songin cell thar bawn de le cell thi umhhmun ah cell thar umh in cetin kin tiksa heh pha hlen de ii. Cell in a naper caan ling loin a thar bawn tento fangin a hiang ai tiksa dang te pawl hnoksak ruai ai cetin uur phuncang suak de le zo lo, minung nunhnak ca poimawh hmun ah Cancer cang lekhaw a laukul roh de ii. Cell naper tawlreltu ber heh cell song ai DNA ii ai, cia DNA heh thil dang in hnoksak ruai fangin am kio ai cell thar bawn tento hiam in umh kio de hnak Cancer tiin ko ii.2011 kum ah Canada ram ah mi 100 ah 30 heh Cancer in thi ii. 2011 kum hnua lam ah Cancer in thi hnak tam sinsin ii. Laivum ah ram cianghlim le khangso ram ah Cancer tam sinsin bangin ram khangso le din-aih pha lo ai nuncakhnak lam siik dun harsa hmun ah tu Cancer pung cak sinsin ii. Cancer cang thilhnak tam ngai lak songin Zu heh mi tam ngaiin linghnak le dinghnak i maanin Zu thula ruat tlang pha ii.

Zu ding maanin cang hnak Cancer tam ber tu:

1) Kam song (mouth, throat, voice box, esophagus) Cancer
2) Thin (Liver) Cancer
3) Ril lam (Colon and Rectal) Cancer
4) Hnawi (Breast) Cancer

Zu in kontin Cancer pung ruai?

1) DNA hnawm ruai:
Minung tiksa (tissue) heh kin thi hlan tian a song ai cell te pawl a thar in thleng tio ii. Cell hlun ti ai cell thar in thleng tio ii. Kin cak lo, kin tar tete fangin cell thar bawn thilhnak kin tiksa ah niam tete ai kin tiksa hnawm tete de ii. Cell thi tuh le thleng tuh hnak heh cell song ai DNA thupui ngai ii. Zu in cell song ai DNA hnawm ruai thil ai cell te thi tuh le cell thar bawn tuh hnak danglam thil ii. Cetin cell song ai DNA danglam in cell thar bawn tento ai, com ti nia umh lo fangin cell heh Cancer ah cang de ii.

2) Tiksa ca pha lo te pawl baai niu in lut ruai:
Zu in thil tii ruai thilhnak (Solvent character) nai ii.Minung tiksa hrang pha lo hnak kuak maikhu (tobacco smoke) song ai thil pha lo te pawl heh Zu in tiksan song baai niu in lut ruai ii. He maanin Zu ding kongin Kuak fawp te pawl heh cancer ngah baai ii.


3) Vitamin le tiksa hrang kuulhnak niam ruai:
Vitamin phunkhat Folate heh minung nuncak tuhin a poimawh roh ii. Kin rong aihnak songin Folate vitamin heh kin tiksa in lang de hnak Zu tlawm ruai de ii. Zu ding tam fangin a roh sin sin ii. Folate tlawm lekhaw hnawi le pum/ril lam cancer umh baai ii.


4) Estrogen le hormones dang:
Estrogen heh nupang ca hnawi khang ruaihnak hormone phunkhat ii. Zu in estrogen tam ruai ai cetin hnawi cancer tam ruai ii.


5) Rithnak:
Zu ding tam ze lekhaw tiksa ah calorie tam ruai ii. Ciamaan zu ding te pawl heh thau tete, ngaw tete thai ii. Rit ze le thau ze in cancer phun dang dang hlen de ii.Ciamaan, tun san ah laivum hniavua riim sinsin, kin ai le dinghnak ti le rong khai chemical phuncang tel tam sinsin, kin lailung tuamtu hlivua hnawm maanin ni an kin tiksa ca pha lo hnak leu te pawl lailung ah hleng tam sinsin lak songin Zu le Kuak te pawl daai beet le singkhaw kin nunhnak man nai roh heh lovangin com ruai thai ii sing.


Laai rinsanhnak: http://www.cancer.org/


Salai TluangKipThang LaizoZanniat
Ottawa, Canada
“Think Globally and Act Locally”
https://www.facebook.com/salaithangte

Only registered users can comment.