Kin khangso tuhin Philosophy, Science & Technology

Kin khangso tuhin Philosophy, Science & Technology

tktKhangso tuhin kin kulhnak zai ber tiin zawtdun singlai relpha tam ngai tuh ii. A baai berin mi tam sawn in rel tuhhnak tu Pathian ti tuh ii. Pathian ling tuh, Piangthar tuh. Cen, Fel tuh, Tangdor tuh, Thakol tuh te pawl reel zianzo thai ii.

Bulpak le innsang khangso a kul bangin mi tam ngai huapin tumtahhnak nai in khangso thiam tuh poimawh ngai ii. Mi tam ngaiin bulpak le innsang ah khangso ben ii. Mi nai roh roh, mi lian roh roh, laai thiam le phunsang rohroh tam ngai umh thai ii. India ram dinhmun siik le singkhaw mi tam ngaiin a relhnak ah mipui heh acozah hnakin a lian sawn ti ii. India ai Punjabi te pawl a lian daan heh baai lo ti ii. Ikhalkhaw India ram tlawn le singkhaw lam hiang ah ui le ar bangin ramsa bangin laipua le hnawmborhlak ah umh lianglo tam sawn ii. India ram in a samhnak tu mi tam ngai huap in a khangso lo maan ii. Kin Laimi song ah khai kin har dehnak pakhat tu mi tam sawn huap in kin khangso lo maanin ii.

Mi tam ngai kilkhawl dunhnak pawlkom cak le lian nai thil tuhin i tu seh, mipui le bulpak in khangso tuhin khai kin kul roh hnak thil pahnih (2) umh in hmu ing.

1) Philosophy

scienceKhawruathnak le hmudan khangso fangin miphun le ram khai khangso de ii. Tun kin san tian in laivum ramkhangso te siik fangin kin hmuhnak, mipui in rorel/thunaihnak daan tiin kin linghnak Democracy tihnak heh tunhlan Bawi Zisuh suak hlan kum 500 dung ah Greek ram ah hmang pan awnghnak in tun kin san tian in he daan heh daang dang te lak ah a pha ber in mi tam sawn in daih tlanghnak ii. Kin “Kawlram khai Democracy i lo maan kin har”, ti de ii sing. Democracy thawn hmaiton heh Communism ii ai cia khai Greek san lai ai khawruathnak lam ai mi hmingthang Plato le Pythagoras te ai ruathnak in suakhnak tiin mithiam te in rel ii. Cen, biakhnak rori in zai hmuahhmuah uk kuul in ruathnak khai Islam dinhtu Mohammad ai khawruathnak in hampan ai tun kin laivum ah Muslim heh a cak ber ah cang hang ii.

Biahnak (Religion) heh minung kin khawruathnak roh ngaiin hoi bentu pakhat ii. Biakhnak lam in lungrual baai roh bangin tawngdun le ngaih lo dun khai baai roh ii. Mi tem niu song ah pawl phuncang suak thai ii.

Zanniat mi khai lungrualhnak lam ah i tu seh, khangsohnak lam ah i tu seh kin samhnak ber pakhat tu Philosophy (Khawruathnak) ah ah samhnak nai maanin ii sing. Zanniat mi in Philosophy ah kin khangso lekhaw kin samhnak te, kin kulhnak le kin hiamhnak te pawl heh lingthiam dun hluahlo tuh ii sing.

2) Science & Technology

artscitech_splashTun laivum ah ram cak ber le lian ber siik fangin Science le Technology ah khangso te pawl ii. World War 2 (Laivum raalpui 2hnak) ah ram lian rohroh te pawl tawngdun ai cia te lak songin a hnuata ber ah a cak ber ah ding suaktu heh USA ii. Nuclear thiamhnak a naihnak in a laukul ber le cak ber ah ding suak kio ai tuntian in laivum in a upat le lauhnak ber ram i hlen ii. Laivum tluanthu siik fangin Asia ram le Arab ram te pawl khai a lian roh roh a cak rohroh napui a Europe le Western ram te thawn a danglamhnak tu European mi te pawl heh thil heh a pha sawn le danglam deuh bawn hiamhnak thinlung nai ai Technology lam ah khangso sawn ii. Chinese (Taluk) miphun heh laivum ah zian (gun powder) hmang hmasa ber miphun i napui maithal pha le bomb pha pha heh European te pawl in bawn suak hmasa ai Asia le Arab ram te hnakin a cak sawn ai a khangso sawn ii.

Laivum ai miphun hmuah hmuah in vaang (knife) hmang sek ii. Tunhlan kum 200 dung ai kin Zanniat pipu te in khai kontin thiir (iron) tawk pan i ni maw, thiir in bawnhnak vaang le kutken dang te pawl nai ve ii. Ikhalkhaw kin kin pipu te vaang le tunhlan kum 100o dung ai Europe ram lam in hmanghnak vaang siik le singkhaw a bawndan, a mawidan, a hmang hiamdan a bangdun lo ze ii. Thing in inn sang kin thiam sek napui kin Zanniat pipu te in thing in inn sa dan le tun hlan kum 1000 dung ai Europe lam ai Greek le Rome te pawl inn sa dan bang lo ze ii. Chinese miphun lak songin Chin mi heh suak in reel dun ii singkhaw, tunhlan kum 1000 dung ai Chinese te pawl in vaang le tun naai Zanniat mi pipu te pawl ai hmanghnak vaang heh a khangsodan bang lo ze ii.

Ciamaanin kin khangso tuhin Science le Technology ah kin khangso tuh poimawh ii. Mi bawnhnak ring menma, mi bawndan cuung menma le singkhaw mi hnua ah umhthai ii. Mi hnakin danglam le pha sawn bawn hiamhnak thinlung thawn thil thar bawn zuam tuh kin poimawh ngai ii.

Salai TluangKipThang LaizoZanniat
“Think Globally and Act Locally”
https://www.facebook.com/salaithangte

1 Comment

  1. Avatar
    Thian Cung May 07, 2014

    science le Technology he hmang thiam le sing khaw, kin minung te hrang ah phat hnak tam ngai kin pe i. Hmang thiam lo le sing khaw, minung tam pui hnawm can hnak ah khai lo cang thai ii. Cia man in, Science and Technology khiah hmang thiam thai in lo zuam tlang kin kul tio ii.

Only registered users can comment.