Sat. Jun 22nd, 2024

Thufiim 1 : 1 – 33

Thufiim Songlawihnaak
1:1 David fapa Israel kumpibawi Solomon thufiim te ii.
2 Fiimhnaak khuaruah pha le thutak reel hnaak ling thilhnaak na nai thai tuh ai na bawmtu tuh thufiim um ii.
3 Cia thufiim in, fiimniu ai nung thai hnaak, a cang, a kuung le hmaai siik ce nai lo ai na nung thai tuh hnaak na cuuk ai.
4 Lungmu tlawm te fiim ruai thil ai Kum dawn te lingthilhnaak le ruahthiamhnaak pe ii.
5 He thufiim in mifiim te fiimhnaak pungzaai ruai tuh ai, A thiamcia te khai konghoi tuh ii.
6 Ciamaan in, mifiim te suahpui hnaak thufiim fianruaihnaak te le, Thu harsa te khiah ling ciang tuh ii.
Tlangvaal Te Thutiamhnaak
7 Pathian kihzah khiah linhnaak hampanhnaak ii, Lungmutlawm tein fiimhnaak le thucuukhnaak zainam lo ii.
8 I fapa, na nu le na pa reel hnaak thu phatak in ngaai tu.
9 Amah te cuukhnaak thu in na nuncan le ziaza na pha ruai ngaai khaw Na lu ai luhum mawi roh le Na hawng ai khii mawi roh cang tuh ii.
10 I fapa, misual te in na sopaw fangin sang duh mah.
11 Ani te in, “Kawi tu, mi pakhat teng reek tuh in bawh nga sing, Mawhnailo te bawh nga sing!
12 Mithi khua in mi a lem bangin a nungpah in lem nga sing, Mawh nai napui hlah khaw khurkua song ai zuk tlok bangin tlok tu seh.
13 Thil mankhung te lang sah sek nga sing khaw Kin inn khiah thil mankhung thawn dim ruai nga sing.
14 Kin tel tu ve lai, Kin ruam hnaak thil te na khan ve nga ing,” ti ai na ti fangin,
15 I fapa cia bang te hnenah feh mah, Amah te feh hmun lampui ah na ke lo rolh mah.
16 Thil phalo bawn tuh ah zuanzaang roh veek ai, Mi reek tuh ngaihhlah tawp ii. 17 Vaaniu te mithmuh ai surthang tawi heh lovaang ii tuh ii.
18 Ikhalselai, he bang mi phalo te in amah te veve thangtawi duun ii, Cia thang songah awk in thi leh tuh ii.
19 Tai ai mi thil ruamtu te khiah cia bangin thihhnaak ah paih duun de ii.
Fiimhnaak Kohnaak
20 Fiimhnaak in zalampui le thilzuarhmun caang ah au ii, Ving vum an rohpui in khua sap ii,
21 Khuapui kawldawng le mi taihmun ah hetih in au ii.
22 Lungmutlawm te, zai cam tian ning voi tuh ii laai? zai cam tian in fiimhnaak zohsuam heh nuam ti tuh ii si? Zai cam tian in fiimhnaak cim in um rih tuh ii si?
23 I hriing hnaak phatak in ngaai tu ih, Khuaruah pha ning pe tuh ing, I fiimhnaak ning khan tuh ve ing.
24 Kawi tuh in ning ko napui ing, kawi hiam lo ii si; Kut ning zah napui zainam lo ii si.
25 Khuaruah pha ning pe hnaak zainam loin um ii sikhaw, I thutiamhnaak khai daih lo ii si.
26 Ciamaan in harsa ning tawk fangin hnih ning san ngaang khaw Kihkuul tawpkhum ning hleng fangin hnih ning san tuh ing.
27 Harsahnaak khiah khuahupui bangin ning hleng ai, Kihkuul simpai bangin ning hual fangin thinpit le thin rimsu in um tuh ii si.
28 Cia fangin I ko tuh ii si, ikhalselai ning awi tuh lo ing, Hmun caang ah I sii napui ngaai ii sikhaw i tawk tuh lo ii si.
29 Thulinghnaak cim ii si ai, Bawipa kihzah tuh khiah riil lo ii si.
30 Khuaruah pha i pe hnaak te ning daih lo ai, Thu ning tiam fangin ngaai lo ii si. 31 Ciamaan in ning per hnaak bangin ngah leh tuh ii si, Ning bawn hnaak in uurhnaak ning pe tuh ii.
32 Lungmu tam deuh te in fiimhnaak daihlo maan in thi ii, Lungmutlawm te tu hnuaphnaal maan in hnawm sek ii.
33 Ikhalselai I thu hluuntu te tu him tuh ii. Thincawl tuh zaikhai nai tuh lo ii.
Thufiim 2 : 1 – 22
Fiim Man
2:1 I fapa, na cuuk ing cia zir tu lai, Na bawn ruai ing cia na thin songah khawi tu.
2 Fiimhnaak heh zai ii ti ngaai tu lai, Ling thil tuh in na thinlung thawn zuam tu.
3 Ii ee, hmuhnaak le linhnaak te khiah ngeen ai, Thil lingthilhhnaak caa khai kuun le sikhaw;
4 Nguun bangin ngah na hiam ai, Hlawnthil thup hnaak bangin sii le sikhaw;
5 Bawipa kihzah heh zai ii ti le Pathian ling heh zai ii ti ling thil tuh i si.
6 Fiimhnaak petu heh Bawipa ii ai, Amah hnen an thulinhnaak le lingthilhnaak hleng ii.
7 Mi dikcang te le lungtluang te khiah bawm ai Khaak in ber ii.
8 Misam te kongcung ai thil mawi bawntu te khaakber ai Amah iittu te khiah kiil ii.
9 I thu I ngaai le sikhaw zaitu heh dik, mawi, cang ii ti le I bawn tuh hnaak zai ii ti ling thil tuh ii si.
10 Fiimhnaak na thin songah tlum tuh ai, Hmuh le linhnaak in na aang ruai tuh ii. 11 Na fiim le na lingthilhnaak in na khaakber tuh ai,
12 Thil pha lo bawn tuh na kham tuh ii. Pong phalo hmang ai mi hnok ruaitu lak an na kiil tuh ii.
13 Cia tein khuathim song um hiam in lamcang khiah hlum ii;
14 Thil phalo bawn khiah amah te hiamhnaak ii ai, Thilkhelh bawn fangin aang de ii.
15 Ring tuh lo le, san tuh lo hnaak mihing te ii.
16 Kaa naal dengdo ai na zawltu nupang phalo hnen an na o tuh ii.
17 Cia nu tu a pasal hnen ai kuung lotu le, Pathian hnen ai a thutiam zainam lotu ii.
18 A inn ah feh le sikhaw thihhnaak lamkhung hluuntu I hang si.
19 A hnen ai fehtu heh aisu khai let nawn lo ii. Nunhnaak lampui tawk nawn lo ii. 20 Cia ii maan in mipha te lampui khiah hluun tu lai Mi dikcang te nung bangin nung tu.
21 Mi dikcang le mipha te tu he laivum ah um tuh ii.
22 Ikhalselai mi phalo te tu cia ram ah Pathian in hnawn tuh ai, A hnuk pah phaai tuh sek ii.

Thufiim 3 : 1 – 35
Tlangvaal Te Tiamhnaak
3:1 I fapa, na zirh ing cia te lo hai mah, Bawn na ruai ing cia te hih tu hleen.
2 I thu cuukhnaak in san sauhnaak le nunnuamhnaak na pe tuh ii.
3 Nunkuunghnaak le rinkuul na ihnaak in zaikom khai na hlum mah seh. Na hawng ah velh tu lai na thin ah ngaan tu.
4 Ciabang in bawn lesikhaw, Pathian hmaai le mihing te hmaai ah hmaaiphahnaak le thangphathnaak ngah tuh ii si.
5 Bawipa khiah na thinlung veeksen in ring tu. Na ruah hnak le na linhnaak te ring mah.
6 Na bawn hnaak caang ah Pathian hih tu hleen, Amah in lamkhung cang na hmuh tuh ii.
7 I fiim bang paam tiin ruat mah; Bawipa thu hluun tu lai, sualhnaak khiah hlum tu.
8 Cia bangin bawn lesikhaw, sii pha bang cang tuh ai, Na hmaihma le na uur na lawm tuh ii.
9 Bawipa khiah na sum le saw le, na rong tharhmuasaber thawn thangphat tu.
10 Cia bangin bawn lesikhaw, na been ah rong dim tuh ai, Na cabitti beel ah cabit thar leet tuh tliatlo ii.
11 I fapa, Bawipa thutiamhnaak khiah zainamlo in um mah, Na hau fangin na thin uur in zaangtaak mah.
12 Zaimaan in tifangin, pa in a iithnaak a faa te hriing ai cuuk bangin, Bawipa in a iithnaak te thu cuuk de ii.
13 Fiimhnaak naitu te khiah mi hmuifu ii, Lingthilhnaak nai te khai mi hmuifu ii.
14 Fiimhnaak heh nguun tahin man sawn ii, Sui tahin mankhung sawn ii. 15 Fiimhnaak heh lungvaar tahin mankhung sawn ai, Thil sam thawn teh thilh lo ii.
16 Fiimhnaak in san sauhnaak, naihhnaak le zuulhnaak na pe ii.
17 A lamkhung heh nunnuamhnaak lampui ii ai, A lam hluun in kin him ruai ii.
18 Fiimhnaak nai te khiah aang ii. Fiimhnaak in nunhnaak pe ii.
19 Bawipa in a fiimhnaak thawn laipua bawn ai, A thulinhnaak thawn vaan kho ruai ii.
20 A fiimhnaak in ruun ti zuu ruai ai, Lai vum ah ruahsi tuh in mairo um ruai ii.
21 I fapa, na fiimhnaak le na thu lingthilhnaak khiah kho in awh tu tio, Zaikom in khai na hnen an tlaan ruai mah, Ciate in nunhnaak na pe tuh ii. 22 Na rauhla caa ah nun hnaak ii tuh ai, Na hawng caa in mawi hnak cang tuh ii.
23 Lampui dunghluun ah himniu in feh thil nga sikhaw, Bah khai na bah tuh lo ii.
24 Zaan na it fangin na lau tuh lo ai Muang ngaai in zaanvaar mitmu tuh ii si.
25 Mi phalo te kongcung ah khuahusia bang ai hnawphnaak hleng fangin, Zai khai thin na cawl tuh lo ii.
26 Bawipa in him le cak niu in na kilkhawl tuh ai, Thang tawi hnaak songah na tlok ruai tuh lo ii.
27 A kuul le a sam te kongcung ah na bawn thai tawp in thilpha bawn tu.
28 Na innhneen khiah a tuun fefo ai bawm thil thai hnaak ilekhaw thaaininghla tian iang mah.
29 Nangmah na ring ai na hiang ai umtu na innhneen kongcung ah harsahnaak bawn tum mah.
30 Na kongcung ai hnawmcanhnaak bawn awng lotu khiah hau mah.
31 Mi lellawk thai khiah lo ot mah. Amah bang ai bawn tuh ngaaisung mah.
32 Zaimaan in ii ti fangin, Bawipa in thil phalo bawn te ningdul ai, Mi dikcang te khaakber ii.
33 Bawipa in mi phalo te inn khiah awrsiat ai, Mi dikcang te inn khiah hmuifu pe ii.
34 Mi zainam lo te khiah zai khai nam ve lo ai, Hniatacuh te kongcung ah a iithnak laar ruai ii.
35 Mifiim te in zuulhnaak le songlawihnaak ngah tuh ai, Lungmutlawm te’n tu zakthihpha leek co tuh ii.
Thufiim 4 : 1 – 27
Fiimhnaak Ai Hnempuihnaak
4:1 I faa te, pa te ai ning cuuk hnaak phatak in lo ngaai tu ih lai, Lingthilhnaak nai thai tuh in lo hih tu ih.
2 Ning cuuk ing cia heh a pha ii manin hih tu tio ih.
3 I nu le I pa fapa naihlam ing ai, I nauta laai pah,
4 I pa in thu I tiam ii, “I reel hnaak thu khiah hih tu tio lai, Zaikom in khai hai mah. I reel bangin bawn tu lai na nung ngaai.
5 Fiimhnaak le lingfianhnaak lang tu lai, I reel hnaak thu zainam loin zaangtaak mah.
6 Fiimhnaak khiah hlum tlap mah lai na kiil tuh ii, Iit tu lai, na him ruai tuh ii.
7 Fiimhnaak nai heh na bawn thil hnaak thil thupui ber ii, Zai sam na nai tah in fiimhnaak nai tu sawn.
8 Fiimhnaak daihtu lai na hon do tuh ii, Kho in awh tu tio lai zuulhnaak na pe tuh ii.
9 Amah khiah na lu vum ai Songlawihnaak papaar lukhip mawi ii tuh ii.”
10 I fapa, I thu ngaai tu, I reel hnaak rohpui in ruat tu lai na nun na sau tuh ii.
11 Nuncan pha na hmuh zo ing, Fiimhnaak te khai na cuuk zo ing.
12 Fiim niu in feh lesikhaw na lampui zai in khai na khaak tuh lo ai, Na dawp fangin na bah tuh lo ii.
13 Na zir hnaak te pom kho tu lai, Phatak in kilkhawl tu. Na nunhnaak ii. 14 Mi phalo te feh hmun ah feh mah; Mi taktaailo te nuncan lo cuung mah.
15 Bawn puipa mah! Mi phalo te hnen an tlaan tu lai, Pial tu lai feh tu zianzo.
16 Misual te tu thil phalo zaital bawn lo fangin mitmu thil lo ii. Mi pakhat teng tuahmawh hlah lekhaw mitmu thil lo ii.
17 Sualhnaak khiah sanghum bangin ai ii; Mi tuahmawhhnaak khiah zu bangin ding ii.
18 Ikhalselai mipha te lampui khiah ziingkhuan an sun tian vaar aam aam khuavaar bang ii.
19 Mi phalo te lampui tu zaan khuathim bang ii, Zai ber fon ai kin bah ti khai ling lo ii.
20 I fapa, I reel hnaak thu phatak in ngaai tu, I pong hnaak hluun tu.
21 Na hnen an zaikom inkhai paai ruai puipa mah, Hih tu tio lai na thin songah khawi tu.
22 A lingthiltu zongzong caa nunhnaak ii ai, A hmutu caa cakhnaak ii.
23 Khuaruat fangin raalring tu, Zaimaan in tifangin na khuaruah in na nun na rem sah ii.
24 A dik lo thu zaikhai reel mah, Pon khelh le thudon te reel mah.
25 Hlaanlam cangniu in siik tu lai muang roh in vaak tu; Zakthi in na lukhup suk mah.
26 Na bawn tuh hnaak hlaanvom in khuakhangtu, Ciatih ai na bawn hnaak te heh bawn ben tuh zianzo ii si.
27 Thil phalo khiah cang tu lai hlaanlam ah a cang in feh tu, Lampui dik an kal khat khai tliar mah.

Thufiim 5 : 1 – 23
Nu Le Pa Sualhnaak Raalring Tu
5:1 I fapa, I fiimhnaak le I linhnaak te phatak in ngaai tu lai phatak in ngaaisung tu.
2 Cia fangin kontih in ziaza pha nai thil tuh ing ti ling nga si, Na ponkam in na thu linhnaak khiah laar ruai tuh ii.
3 Nupang dauzal awkaa heh khoiti bangin hlum tuh ii, A ponkam khiah olif thau bangin naal tuh ii.
4 Inapui ai a tawpkhum ah tu A kha le harsahnaak leek hlum tuh ii.
5 Amah in mithi khua ah na zuk duuk tlap ngaai khaw, A hluun hnaak lam khung khiah thihhnaak lamkhung ii.
6 Nunhnaak lampui ah um loin vaaivaak ai, Zai cang ii ti khai ling duun lo ii.
7 I fapa, I thu ngaai tu lai, I reel hnaak thu zaikom in khai lo hai mah.
8 Cia bang nupang khiah cang tu; A dawngkhaam hiang ah rin lo vaak mah.
9 Cang hlah le sikhaw na naih sa upathnaak khiah Mi in na sut tuh ai mi ninghio nai lo kut in, Na nauta laai pah thi tuh ii si.
10 Mi phundang tein na naih le siah na sut tuh ai, Na nihlawh khiah misam in ngah tuh ii.
11 Na thi dawn fangin na kam riat nga sikhaw, Na ti le sa te zur in rom tuh zianzo ii.
12 Cia fangin, “Zaimaan in zir ta lo ing? Zaimaan in thu I cuuk hnaak zainam lo in um I pa ing?
13 I cuuktu te thu hluun lo ing. I reeltu te zai inkhai nam fawn lo ing.
14 Ciamaan in rinlopui mi hmaai ah Zakthih tuar ing, tiin ti leh tuh ii si.
15 Na nupui kongcung ah kuung in um tu lai, Amah pakhat leek iit tu.
16 Asam nupang ai na cawi sah hnaak faa te in, Na phathnaak zaikhai bawn tuh lo ii.
17 Na faa te na bawm tuh in hon khang tuh ii, Mi phundang te’n na bawm tuh lo ii.
18 Ciamaan in na nauta laai ah na nupui kongcung ah aang tu, A kongcung ah aang tu lai thinnuam tu.
19 Amah khiah kiho nu bangin mawi ai daihkuul ii. A daihkuul hnaak in na aang ruai tuh ai, A iithnaak in na zeel tuh ii.
20 I fapa, zaimaan in nupang sam daih ii si? Zaimaan in mi nupui mawi hnaak khiah daih sawn ii si?
21 Bawipa in na bawn hnaak zongzong hmu sek ii. Na feh hmun caang ah na siik ii.
22 Mi siava te sualhnaak heh thang tawi hnaak bang ii, A tawi hnaak suurthang ah mi te awk ii.
23 Amah veve kilkhawl duun ben lo maan in thi ii, A voi ze hnaak in hlaankua ah hleng tuh ii.

Thufiim 6 : 1 – 35
Raalrintuh A Hincaang
6:1 I fapa, mi pakhat khat ai laiba hnaak ah, thu lo kam awng aw sim?
2 Na ponkam in na tawi ngah ai, Na thukhaamhnaak in na awk ii awm? 3 Ciatih ilekhaw I fapa, cia pa kut ah um ii si ai, Hetih bang ian in thang ri hawk thil tuh ii si. A hnen ah rang roh in feh tu lai, suak tuh in ngeen tu.
4 Mitmu in com meenma mah.
5 Sadawi kut songan vaaniu le kiho suak teu bangin Thang an suak tuh tum tu.
6 Thazawng te in sirsing khiah siik tu seh. Sirsing nuncan siik in zir tu seh.
7 A ni te in tu, hoitu bawi le uktu nai lo ii.
8 Ikhalselai khaal teng ah rong khawl ai Khuasik cuu caa ringcia ii.
9 Thazawngpa tu zai cam tian mitmu tuh ii laai? Zaikom in tho tuh ii ni? 10 Amah in tu, “Cam khat zau rih ngaang, Cam khat niu kut sih in com rih ngaang,” ti ii.
11 Ikhalselai, a mitmu teng ah farahhnaak tawk tuh ii; Vaang hmuh in ruko ai a thilri sut tuartupa bangin Samhial in um tuh ii.
12 Zaitlaak lo le mi siava te tu Thudon tuh in khuaha vaak de ii.
13 Mit na khiap tuh ai kut na zah tuh ii.
14 Cia bangin thin siava hnaak thawn phatlohnaak thu reel ai, Hmun cang ah harsahnaak suak ruai ii.
15 Ciamaan in amah te kongcung ah harsahnaak hleng vut ngaai khaw, Thithai tian in maa tuar tuh ii.
16-19 Bawipa cim hnaak thil paruk um ii, A ningdul hnaak pasarih um ii. Hngal mithmaai, Thudon reel tu lai, Mawhnailo reektu kut, Thusia leek ruattu thinlung, Thilsual bawn tuh zuanzangtu ke, Thudon ree ai thulingpuitu ihnaak, Suahpui unau lakai harsahnaak suak ruaitu te ii.
Nu Le Pa Sualhnaak Raalring Tuh
20 I fapa, na pa reel hnaak bangin bawn tu lai, Na nu cuukhnaak zaikom in khai hai mah.
21 Amah te reel hnaak thu te hih tu tio lai, Na thin ah khum tu.
22 Khual na sii fangin na cuuk cia thu te in kong na hoi tuh ai, Zaan fangin na kilkhawl tuh ai, sun fangin ruahhnaak na pe tuh ii.
23 Na cuukhnaak thu te khiah vaar tuh tio ai, Amah te thu cuukhnaak in na nundaan na zirh tuh ii.
24 Nupang phalo le mipui te zawlhnaak an na khaak na hup tuh ii.
25 Na thin in amah te mawihnaak iir mah, Mit khiap hnaak in na zawl mah seh.
26 Mi pakhat in tisazuarnu khiah, Sang hlom khat man thawn zawng thil ii, I khalselai, mi nupui, mi pasal thawn sualhnaak in tu, A naih hnaak thi zongzong lek zolo in a nunhnaak tian bo ruai tuh sek ii.
27 Na pon kaang lo niu in na kaang ah mai dah thil aw sim?
28 Na ke kaang lo niu in mailing vum ah vaak thil aw sim?
29 Cia bangpah in, mi nupui ihpui heh laukuul roh ii, A ihpuitu aisu khai reem tuar tuh ii.
30 Riikaam ai rong rutu khiah mi in zohsuam cel lo ii,
31 Ikhalselai pom ngah lio lekhaw a let letsarih ruul tuh ai, A naih hnaak zongzong khiah pe tuh ii.
32 Ikhalselai mi nupui sualpuitu heh khuaruah nai lo lungmutlawm ii. Amah veve hnawmcan duun ii.
33 Cawhkuan an tuh ai a hming sia tuh ii; Kumzaangza zakthih phur tuh ii.
34 Pasal in a nupui khiah umhlah lekhaw Roh bik in haa tuh ai a phuusukhnaak khiah dap nawn lo ii.
35 Zai bang ai luut inkhai a thin dap ruai thil lo ii.
Thufiim 7 : 1 – 27
7:1 I fapa, I reel hnaak lo hih tu tio lai, Bawn tuh ai na ruai ing cia hai mah.
2 I reel hnaak bangin bawn tu lai na nung tuh ii, I thucuukhnaak te khiah na mitmu bangin kilkhawl tu.
3 Na cuuk ing cia te hih tu tio lai, Na thin songah ngaan tu.
4 Fiimhnaak heh I farnu ti tu lai, Lingthilhnaak khiah I rualpui phaber ii si, tiin ti tu.
5 Mi nupui le mi zawlthai pong thiam nupang an na hup tuh ii.
Nupang Sual
6 Vai khat ah I inn kotka an sumpua hliir ingkhaw,
7 Khuaruah nai lo naupang te lakah, Lungmu nai deuh lo tlangvaal pakhat hmu ing.
8 Amah khiah nupang phalo umhmun inn lampui lamah feh ii.
9 Zaanlam khuathim hnua ah ii.
10 Cia le, nupang phalo in lo caang ii. Cia nupang tu tisazuarnu bangin thilthuam vong ii.
11 Amah heh mi pangam le zakthih nailo nupang ii, inn taang lo ai vaak tio de ai,
12 Vai khatkhat ah lampui ah, ihlahlekhaw, lam ning le thil zuar hmun ah ding ai tlangvaal bawh de ii.
13 Cia tlangvaal khiah kuah ai thuut ii; zakthi loin siik ai,
14 “Tuun nia hibawl ing ai, hibawlhnaak sa khai nai ing.
15 Ciamaan in na sii tuh in, inn an suak ingkhaw tuun in na tawk hang ing.
16 I khuahluan ah Izipt vopon mawi roh phah zo ing.
17 I khuahluan khiah mura le aloe rimhmui phiah zo ing.
18 Kawi tu lai, zaan vaar nuamhnaak ah niat duun nga sing, Kuah duun in nuam kawm nga sing.
19 I pasal inn ah um lo ii, Ram hlapui ah khualsi ii.
20 Tangka dip dim in keng ta khaw, Hla thuul hlaan lo tu tlung tuh lo ii,” tiin ti ii.
21 Daihkuul a ponkam hlum niu in zawl ngah ai, A mi lawm thiamhnaak in hoi teu ii.
22 Kawlpaw cang in a reh tuh hmun lam hluur bangin,
23 Cankiang ai kah tuh kiho ai thang a rah bangin, Cia nupang khiah hluun ii. Vaaniu heh thang ah to ngah bangin A nunhnaak caa laukuul ii ti linglo ii.
24 Cia iimanin I fapa te, ngaai tu ih. I reel hnaak thu phatak in ruat tu ih. 25 Cia bang nupang phalo lam ah ning thin nong ruai mah ih, A hnua khai hluun mah ih.
26 Amah maan in pasal tampui hnawm ai thi zo ii.
27 A inn ah feh lesikhaw mithi khua feh thawn ning bang ii hang, Thihhnaak horkuam thawn bang duun ii.

Thufiim 8 : 1 – 36
Fiimhnaak Thangphat
8:1 Ngaai tu! Fiimhnaak in na ko ii, Lingthilhnaak khiah au hnelhno ii.
2 Lamkhung hiang ai mual phundiir vum ah le, Lam kheek ah ding ai,
3 Khuapui tlum hmun kawldawng ah au ai,
4 “Mihing te, ning ngeen ing, Laivum um mi zongzong ning ko ing.
5 Ruathnaak lam ai puikim laailo te, puikim tuh in zir tu ih. Lungmutlawm te, khuaruah pha zir tu ih.
6 A pha hlaihlawr I thu te ngaai tu ih, I reel hnaak heh dik ii.
7 I reel hnaak heh thutak ii. Thudon heh I cim hnaak ber ii.
8 I kaa an suak hnaak thu zongzong heh dik ii, Mi khelh ruai hnaak le diklo um lo ii.
9 Lingthiltu te caa tu fian sek ai, Fiimhnaak hmutu te caa ah dik sek ii.
10 Tangka tah in ning ruai ing cia riil tu sawn ih, Sui phaber tah in fiimhnaak riil tu sawn ih.
11 “Kai heh fiimhnaak ing ai, lungvaar tah in pha sawn ing, Na daih hnaak zai thawn khai saanteh thil tuh lo ii si.
12 Kai heh fiimhnaak ing ai, lingthilhnaak khai nai ing. Linhnaak le thukhan thilhnaak nai ing.
13 Bawipa kihzah heh sualhnaak cim ii hang. Hngal le puar, lamkhung sual te, pong diklo te cim ing.
14 Khuakhan bawntumhnaak nai ing khaw bawn pet sek ing, Lingthilhnaak nai ai I haat ii.
15 Ram uk naper ah kumpibawi te bawn ing, Ram ukhnaak daan pha bawn tuh in uktu te bawm ing,
16 Laivum ai ram uktu te, ram napertu te le, Ukhnaak lam ai upa te hmuah khiah kaimah bawm hnaak thawn ram uk ii.
17 I iitu te iit ing, I siitu in I tawk tuh ii.
18 Naihhnaak le hmingthanghnaak nai ing, Sum le saw nai ing ai mi nai nung ing.
19 I hnen an na ngah hnaak te tu, A pha ber sui le nguun tahin pha sawn ii.
20 Dikcanghnaak lampui ah feh ing, Lampui dik khiah hluun ing.
21 I iittu te khiah nai ruai ai, Amah te inn heh hlawnthil thawn dim ing. 22 “Bawipa in he hlaanlaai ai a thil bawn hnaak lakah, Kaimah I bawn hmasaber ii.
23 Laipua seem hlaan ah kaimah heh hmasaber ai bawn hnaak ii.
24 Tipuithuanthum le ruunpui te um hlaan ah I suak zo ii.
25 Mual le tlaang te um hlaan ah, I suak zo ii.
26 Laipua le ram te le kut zawi dim laivut a bawn hlaan ah Pathian in I bawn zo ii.
27 Vaan a bawn teng le tipuithuanthum a bawn tengah um zo ing.
28 Mairo te vaan ah hon dah tengah ii seh, Tipuithuanthum tihnaar te a um ruai tengah ii seh;
29 Tipui te a puut hmun tah ai saang sawn ah kaai tuh lo thu pe teng ah um zo ing. Laipuapui a ham toh tengah khai um ing.
30 Naupang bangin a hiang ah um ing, Nisiar ai a aanghnaak heh kaimah ing, A hmaai ah I aang tuh tio ii.
31 Laivumpui le a vum um mihing te kongcung ah, Thin I khim ii.
32 I faa te, I reel hnaak thu ngaai tu ih. I reel hnaak bangin bawn tu ih lai ning nung ngaai.
33 Ning cuuk ing cia ngaai tu ih lai, fiim tu ih, I thu zainam lo in um mah ih.
34 I thu ngaai ai nisiar I dawngkhaam hiang ah um ai, Inn song I tlum tuh lo iangtu khiah aang tuh ii.
35 Kaimah I hmutu in nunhnaak ngah tuh ai, A kongcung ah Bawipa aang tuh ii.
36 Kaimah I tawk lotu heh amah nunhnaak hnawmcantu ii ai, I huatu heh a thi hiamtu ii.

Thufiim 9 : 1 – 18
Fiimhnaak Le Voi-hnaak
9:1 Fiimhnaak in a inn sa zo ai, a khuam pasarih bir ii.
2 Puai bawn hnaak ah sum-aar ro ii, A cabitti ah rimhmui rawi ai cabuai khai pharh zo ii.
3 Khua laaiteng ai hmun saangber an khua sap tuh in A nupang omhlawh te hlat ai,
4 “Khuaruah tem deuh te zongzong heta ah kawi tu ih,” tiin sap ii. Mivoi deuh te hnen ah,
5 “Kawi tu ihlai I sanghum ai tu ih, I roihsa cabitti ding tu ih.
6 Voi hnaak hlum tu ihlai, nung tu ih. Fiimhnaak lampui hluun tu ih,” tiin ti ii.
7 Mi hngalpa thu cuuk le sikhaw zoh na suam tuh so ii. Mi phalo mawhhluuk lesikhaw maa liam tuh ii si.
8 Mi hngal te zaikom inkhai thu cuuk mah, Cuuk lesikhaw na cim tuh ii. Ikhalselai mifiim thu cuuk lesikhaw na zuul tuh ii.
9 Mifiim thu cuuk tu lai fiim tuh aam ii; Mi dikcang thu cuuk tu, a thiamhnaak tam tuh aam ii.
10 Pathian kihzah heh fiim hampanhnaak ii. Cianghlim Pathian ling lesikhaw lingthilhnaak nai ii si.
11 Fiimhnaak in san na sau ruai tuh ii.
12 Fiimhnaak nai lesikhaw hnempuihnaak na pe tuh ii, Fiimhnaak hnawl lesikhaw harsahnaak tuartu ii tuh ii si.
13 Voi hnaak heh a kaa tam ai khuaruah zaikhai nai lo ii, Zakthih nailo, nupang pongtam bang ii.
14 A inn dawngkhaam ah to ii; Ihlahlekhaw khua laaiteng hmun saang ber ah to ai,
15 Mah naper ruat kong ai lam vaak te khiah,
16 “Khuaruah nailo te, he lam ah kawi tu ih,” tiin ti ii. Mivoipa hnen ah,
17 “Ruuk hnaak tidap heh hlum caangce ii, Ruuk hnaak sanghum heh uur deuh ii,” ti ii.
18 A inn ai fehtu te thi sek ai, A inn song tlum ben zo te in tu, Mithi khua thuukpui ah um ii ing ti ling tlaang lo ii.

Thufiim 10 : 1 – 32
Solomon Thufiim
10:1 Hete heh Solomon thufiim ii. Fapa fiim in a pa aang ruai ii; Fapa voi in a nu thasia ruai ii.
2 A dik lo pui ai na ngahhnaak in phathnaak na pe tuh lo ii. Ikhalselai, dikcanghnaak in na nunhnaak na o tuh ii.
3 Bawipa in mipha te rikaam ai um tuh siang lo ii.
4 Thazawng hnaak in farahhnaak suak ruai ii, Thakol hnaak in naihhnaak suak ruai ii.
5 Rongkhawm cuu ai, rong khawmtu heh mifiim ii, Rong khawm cuu ai mitmutu khiah zakthih kuul ii.
6 Mipha in hmuifu dong tuh ii; Mi phalo pa ai ponkam in a phatlohnaak nundaan thup ii.
7 Mi pha te hih tio heh hmuifu ii, Ikhalselai mi phalo te hming tu mi in hai rang tuh ii.
8 Mifiim te in khuaruah pha pe hnaak saang ii, Mivoi pongtam te tu hnawmcanhnaak ah hleng tuh ii.
9 Mi dikcang te tu cak ai muang ii, Ikhalselai mi dikcanglo te tu mi in ling tuh ii.
10 Thudik thuptu in harhnaak suak ruai ii, Ikhalselai zapui lin ai mi sawitu in remhnaak suak ruai ii.
11 Mipha pa ai ponkam khiah nunhnaak cirhti ii, Ikhalselai mi phalo ponkam in phatlohnaak nuncan thup ii.
12 Cimhnaak in remlohnaak suak ruai ii, Ikhalselai iithnaak in mawhhnaak zongzong hlat sah ii.
13 Mifiim in suullam nai pong ii, Ikhalselai mivoi te tu cawh kuul ii.
14 Mifiim in fiimhnaak khawl ii, Ikhalselai mivoi te ponkam khiah harsahnaak thawn hla lo ii.
15 Naihhnaak in minai te khaakber ii, Farahhnaak in mi farah te hnawmcan ii.
16 Phathnaak bawnman khiah nunhnaak ii, Ikhalselai sualhnaak in tu sual aam aam tuh in mi hoi ii.
17 Thu reel hnaak ngaaitu te nung tuh ii, Ikhalselai I mawh ii ti nuam lotu caa laukuul ii.
18 A thup niu ai mi cim naitu khiah thudon reel te ii, Mi hmingsiahnak reeltu te heh mivoi ii.
19 Tam deuh pong lesikhaw tam deuh khelh tuh ii si, Mifiim ilesikhaw, na pon suup tu.
20 Mipha pa ponkam heh nguun phaber bang ii, Mi phalo pa khuaruah tu man nai lo ii.
21 Mi pha pa ponkam in mi tampui hnempui ruai ii. Ikhalselai na voi hnaak in nangmah veve reek duun thai ii si.
22 Bawipa hmuifu khiah na lian ruaitu ii, Naper tampui na perhnaak in na lian rui hluan lo ii.
23 Thilsual bawn heh nuam titu khiah mivoi ii. Mifiim te tu fiimhnaak songah aang ii.
24 Mi dikcang te in amah te daihhnaak ngah ii, Ikhalselai mi phalo tein amah te lau ber hnaak tawk ii.
25 Khuahu zuang fangin mi phalo te laan tuh sek ii, Ikhalselai mi dikcang te tu him tuh ii.
26 Na napertu tuh in thazawng te lang mah, Lang lesikhaw na kam caa ah cabit thuur bang ii tuh ii; Na mit caa ah maikhu bang ii tuh ii.
27 Bawipa thu hluun tu, na san na sau tuh ii. Mi phalo te tu thih cuu hlaan pah thi de ii.
28 Mi pha te ai uumhnaak in aangpha um ruai ii, Mi phalo te ai uumhnaak tu thulovaang ii.
29 Bawipa in mi dikcangte khaak in ber ii, Ikhalselai thil phalo bawntu te khiah hnawmcan ii.
30 Mi dikcaang te tu him tuh tio ii, Ikhalselai mi phalo te tu ram songah umhmun nai tuh lo ii.
31 Mi dikcang te in fiim thu reel ii, Ikhalselai mi phalo te lai khiah cem leh tuh ii.
32 Mi dikcang te’n tu reel tuh thu mawi nai ii, Ikhalselai mi phalo te’n tu hawmcanhnaak thu loleek reel de ii.