Sat. Jun 22nd, 2024

Thufiim 11 : 1 – 31
11:1 Cuai hmaanlo hmangtu te khiah Bawipa in cim ii, Ikhalselai cuailung hmaan te aan ii.
2 A hngal te in mi zohsuam tawk tuh ii, Ciamaanin, hniatacuh pha sawn ii.
3 Mi pha khiah dikcanghnaak in kong hoi ii, Santlaaklo te tu amah te dikcanglo hnaak in hnawmcan ii.
4 Thih niakhua hleng fangin naihhnaak heh hnempui lo ii. Ikhalselai dikcanghnaak in na nunhnaak na o thil tuh ii.
5 Dikcanghnaak in mi pha pa nunhnaak nuam ruai ii. Ikhalselai mi phalo te tu, amah te phatlohnaak in amah te nunhnaak sawn ruai ii.
6 Dikcanghnaak in mi dikcang luat ruai ii, Ikhalselai santlaaklo tu, a pamhaphnaak in awk ii hang.
7 Mi phalo pa thi fangin amah uumhnaak khai thi fawm ii. Naihhnaak ringtu khaih zaikhai hnempui lo ii.
8 Mi dikcang te tu harsahnaak song in o ai, Mi phalo te hnen sawn ah harsahnaak hleng ii.
9 Pathian zainam lotu te ponkam in hnawm na can thai ii, Ikhalselai mi dikcang te fiimhnaak in na o thai ii.
10 Mi dikcang te bawngphathnak tawk fangin khuapui in aang ii, Mi phalo thi fangin aang ai au tlaang ii.
11 Mi dikcang te in hmuifu pe fangin khua heh hon khang ii, Ikhalselai mi phalo te ponkam in khua hnawm ruai ii.
12 Mi zohsuamhnaak ponkam hmangtu khiah mivoi ii, Na fiim lekhaw na pon suup tu.
13 Kaatam te’n thuthup phuang de ii, Ikhalselai ringtlaak te in tu thup ben ii.
14 Konghoihnaak um hlah lekhaw ram hnawm ii, Khuaruah pha petu tam hmun ah himhnaak um ii.
15 Na ling awng lo hnaak pa caa laiba ruul sah lesikhaw, na sir leh tuh ii. Paaipawh hlah silai na caa pha sawn ii.
16 Mi ngaiharthai nupang khiah mi in zuul ii, Ikhalselai ziaza pha nai lo nu heh zakthih kuul ii.
Thazawng in sum le saw nai tuh awng lo ii, Ikhalselai thakol te khiah lian tuh ii.
17 Mi ninghiothai ilesikhaw nangmah veve hmaaipha pe duun ii si, Mi ninghio nai lo ilesikhaw, nangmah veve hnawmcan duun ii si.
18 Mi phalo tein hnempuihnaak taktak tawk thil lo ii, Ikhalselai thildik bawn lesikhaw perman ngah tuh fefo ii si.
19 Aisu khai phathnaak bawn tuh ngaaisungtu khiah nung tuh ii, Ikhalselai phatlohnaak bawn tiotu aisu khai thi tuh ii.
20 Bawipa in thinlung pha lo te cim ii, Ikhalselai thildik bawntu te daih ii.
21 Mi phalo te khiah reem ii tuh ii ti fian ii, Ikhalselai mi dikcang te luat tuh ii.
22 Mawi roh napui, khuaruah thiam lo nupang khiah, Vok hnaar ai sui vuh sah bang ii.
23 Mipha te daihhnaak in phathnaak suahpui de ii, Mi phalo te in amah te daihhnaak ngah fangin mi zongzong thinraw ii.
24 Mi haatlam te tu siang roh in tangka mi pe khalselai, nai aamaam ii, Mi sam te in suup khalselai farah aamaam ii.
25 Siang in nung tu lai nai tuh ii si, Mi bawm tu lai, mi in na bawm tuh ve ii.
26 A man khang iang ai rong zuar sianglotu khiah mi in awrsiat ii, Ikhalselai a zuar siangtu khiah mi in aan ii.
27 Na bawntumhnaak pha lekhaw mi in na zuul tuh ii, Ikhalselai harsahnaak sii lesikhaw tawk tuh ii si.
28 Naihhnaak ringtu te khiah khuakhaal thing hnah bangin tlok tuh ii, Ikhalselai mi dikcang te tu tlim bangin hing tuh hleen ii.
29 A innsaang ai harsahnaak hleng ruaitu khiah, A tawpkhum ah zaikhai nai tuh lo ii.
Lungmutlawm te khiah mifiim te omhlawh ii tuh tio ii.
30 Dikcanghnaak ai a thai khaih nunhnaak ii, Ikhalselai phatlohnaak in nunhnaak paai ruai ii.
31 Mi pha tein laivum ah phat man co lekhaw, Mi phalo le misual tein zaizah cawhkuan ngah ngaai ti heh fian ii.

Thufiim 12 : 1 – 28
12:1 Fiimhnaak daihtu te sual khelh fangin thu reel daih ii. Thureelhnaak daih lotu tu lungmutlawm ii.
2 Bawipa in mi pha te lawm ii, Ikhalselai phatlohnaak bawn tuh reeltu te hnawl ii.
3 Phatlohnak in mi khaakber lo ii, Ikhalselai mi dikcang te tu kho roh in ding ii.
4 Nupui pha tu a pasal sui lukhuk ii, Ikhalselai a pasal zakthi ruaitu nupui khiah, A ruh song ai khensar uurhnaak bang ii.
5 Mi dikcang in tu thintluang niu in mi kom ii, Mi phalo te in tu mi zawl tuh leek ruat ii.
6 Mi phalo te ponkam tu mi reek tuh hnaak thu ii, Ikhalselai midik te ponkam in mi o ii.
7 Mi phalo te tu thihhnaak tawk ai cii hmit ii, Ikhalselai mi dikcang te innkua khiah kho ngaai in um ii.
8 Mifiim ilesikhaw mi in na lawm tuh ii, Thinlung pha lo ilesikhaw mi in zoh na suam ngaai.
9 Mah nunhnaak caa naa per beetbotu mizaran ii tuh khiah, Mi thupui roh bang ai um bawn ai riikaam tah in pha sawn ii.
10 Mi pha te in a sumhnam kilkhawl ii, Ikhalselai mi phalo te in amah te sumhnam ninghio lo ii.
11 Thakol lovaaipa in aihtuh tampui nai ii, Ikhalselai zai hnempuilo naa per ai a cuu bo ruaitu khiah mivoi ii.
12 Mi phalo te daih hnaak thil tu thil phalo bawn tuh sii khiah ii hang, Ikhalselai mi dikcang te tu kho roh in ding ii.
13 Mi phalo tu amah ponkam in awk ii, Ikhalselai mi pha pa tu harsahnaak an amah thu luat ruai duun ii.
14 Na reel hnaak le na bawn hnaak ah na ngah tuh um ii. Nangmah caca in ngah tuh ii si.
15 Lungmutlawm te in kin dik ii tiin ruat duun tio de ii, Mifiim te in tu mi khuaruah pehnaak saang ii.
16 Lungmutlawm te in a thinrawhnaak laar ruai vual ii, Mifiim in tu, mi zohsuamhnaak rin dapniu in tuar ii.
17 Thudik na reel maan in dikcanghnaak laar ruai ii. Ikhalselai thudon in thudiklo lam ah mi hoi ii.
18 Khuaruah nai cel lo ponkam in vaangsau sun hnaak bangin thuuk roh in mi sun ii, Ikhalselai mifiim ponkam in hmaihma lawm ruai ii.
19 Thu don heh a san com ii, Ikhalselai thudik tu kumzaangza kho ii.
20 Phatlohnaak bawn tuh thureeltu khiah amah veve zawl tu ii, Ikhalselai daphnaak remreeltu te hnenah aanghnaak um ii.
21 Mi dikcang te kongcung ah thil phalo hleng lo ii, Ikhalselai mi phalo te in tu harsahnaak leek tawk ii.
22 Bawipa in thudon reel tu te ciim ii, Ikhalselai mi dikcang tu aan ii.
23 Mifiim te in a linhnaak thup ii, Ikhalselai lungmutlawm te in tu, a voi hnaak laar ruai de ii.
24 Na naper haathnaak in huthawm na pe tuh ai, Thazawnghnaak in sal na can tuh ii.
25 Thincawlhnaak in na aanghnaak hnawn tuh teu ii, Ikhalselai iithnaak, ngaihharhnaak ponkam in thazaang na pe tuh ii.
26 Mi dikcang pa khiah rualpui konghoitu ii, Ikhalselai mi phalo pa lampui in rualpui te lam khelh ruai ii.
27 Tha na zawng lekhaw na sii hnaak ngah tuh awng lo ii si, Inapui ai, tha na kol lekhaw na lian tuh ii.
28 Dikcanghnaak khiah nunhnaak lampui ii; Phatlohnaak tu thihhnak lampui ii.

Thufiim 13 : 1 – 25
13:1 Fapa fiim in a pa in thu reel fangin ngaai ii, Ikhalselai mipuar in tu sual peu ing ti awng lo ii.
2 Mi pha in a ponkam thai ai tuh ii, Ikhalselai mi zawlthai te in phatlohnaak leek caak ii.
3 Na reel hnaak raalring tu lai, na nunhnaak hup tu. Raalring lo ai pongtu khiah amah veve hnawmcan duun ii.
4 Thazawng in a thin song an thil daih roh de ii; Ikhalselai, zaikhai ngah hluan lo ii. Naper khung per tu in a daihhnaak caang ngah tuh ii.
5 Mi dik te in tu thu diklo cim ii. Ikhalselai mi phalo ponkam te tu zakthihkuul le ningdulkuul ii.
6 Dikcanghnaak in mawhnailo te khaakber ii, Phatlohnaak heh misual te tluhnaak ii.
7 Mi haatlam tu minai bangin um ii, Ikhalselai zaikhai nai lo ii; Mi haatlam tu farah bangin um ii, Ikhalselai thilri tampui nai ii.
8 Minai in amah te nunhnaak tlanhnaak tuh tangka hman pha nai ii, Ikhalselai mi farah khiah aisu in khai reek tum lo ii.
9 Mi dikcang te vaarhnaak heh a vaar aam bang ii, Mi phalo te mai-inn tu dit leh tuh vual ii.
10 Puarhnaak in tu harsahnaak leek suah ii, Misam te ruahhnaak ngeen heh phasawn ii.
11 Baai niu ai na ngah hnaak na thilnaih heh zaicamlo pah paai ruai tuh ii si. Harsa roh ai na hlawh hnaak tu rai roh na tha tuh ii.
12 Uumhnaak ngah lo fangin thin uur ii, Ikhalselai daihhnaak khim lekhaw nun heh aanghnaak thawn khim ii.
13 Thureel hnaak thu zainam lotu te khiah, Amah te veve hnawmcan duun tuh ii. Thureel hnaak hluuntu te him tuh ii.
14 Mifiim te cuukhnaak heh nunhnaak cirhti ii, Na nunhnaak kihkuul song ai a um fangin, Ciami te in na luat ruai tuh ii.
15 Fiimhnaak in zuulhnaak hlawh ii, Ikhalselai sangtlaaklo te tu hnophnaak lamkhung hluun ii.
16 Mifiim te tu, thil bawn hlaan ah khua ruat de ii, Ikhalselai lungmutlawm te in tu, a voi hnaak sawn phuang ii.
17 Ringtlaak lo khuasaptu te in harsahnaak hleng ruai ii, Ikhalselai ringtlaak nalaang te in tu daphnaak suak ruai ii.
18 Thureelhnaak hluunlo heh farah hnaak le mualpho hnaak ii, Ikhalselai thureelhnaak hluuntu in zuulhnaak ngah tuh ii.
19 Mah daihhnaak ngah heh zaizah in pha ii, Lungmutlawm te in tu, phatlohnaak an letleh tuh nuam lo ii.
20 Mifiim te kom tu lai na fiim tuh ii, Lungmutlawm kom lesikhaw harsa tawk tuh ii si.
21 Misual te khiah harsahnaak in konzongha ah hluun ii, Ikhalselai mi dikcang te tu phathnaak laksawng co tuh ii.
22 Mi pha in a tu le a faa tian a naihhnaak ro siah tuh ii, Ikhalselai misual te naihhnaak tu midik te kut ah hleng tuh ii.
23 Vaai lo hnaak lo song an farah te caa rong tampui suak tuh napui ai, A cang ai thu reel lo mihing te’n vaai siang lo ii.
24 Na fapa hriing hlahlesikhaw, iit lo ii si. Iit lesikhaw thu cuuk tuh ii si.
25 Mi dikcang te in aihpha rong nai ii, Ikhalselai mi phalo te tu a rii kaam tuh tio ii.

Thufiim 14 : 1 – 35
14:1 Nupang fiim te in a umhmun inn sa ii, Ikhalselai a voi te in, amah te kut lala in bal sek ii.
2 Misam te in Bawipa kihzah ii, Ikhalselai mi awkrawl te in tu zainam lo ii.
3 Mivoi hngal in tam ze pong ai Mifiim pa ai ponkam in amah khiah hup ii.
4 Napertu tuh kawlpaw cang te um lo fangin Na been kawlawng tuh ii, Ikhalselai kawlpaw cang te thazaang in rong tampui suah tuh ii.
5 Rintlaak thulingpuitu in thudik reel de ii. Ikhalselai rintlaaklo in tu thudon leek reel ii.
6 Mi puar te tu mifiim cang thil lo ii, Ikhalselai mifiim te in tu baai niu in thu zir ii.
7 Mivoi hiang ah um mah, Na zirh pha zai khai nai lo ii.
8 Zaimaan in mifiim te fiim ii ni? Zai bawn tuh ing ti ling maan in fiim ii. Zaimaan in mivoi te voi ii? Ling ing ti ai vuah duun maan in ii.
9 Mivoi te tu sual in khai zai poi lo ii, Ikhalselai mi pha in tu sualhlat zo hnaak ii tuh khiah daih ii.
10 Na aanghnaak heh nangmah ai ii, Na thasiahnaak khai nangmah ai ii; Aisu in khai na naih bawm ve lo ii.
11 Mi phalopa inn khiah hnawm sek hnua ah rin mipha pa inn tu kho tuh hleen ii.
12 Lampui dik ti ai ruat hnaak in thihhnaak ah kong na hoi tuh ii.
13 Hnihhnaak aw in thasiahnaak aw khum thil ii, Ikhalselai aanghnaak bo fangin, Thasiahnaak taang tuh hleen ii.
14 Mi phalo te’n phatlohnaak man ngah tuh ai, Mi pha in phatman ngah tuh ii.
15 Khuaruah tem tein a linghnaak zongzong sang ii, 16 Mifiim te in tu ralring in um ai phatlohnaak khiah cang ii, Ikhalselai lungmutlawm in tu raalring loin a rang in thil bawn de ii.
17 Mi thincom te tu voi hlawh in thil bawn de ii, Ikhalselai mifiim deuh te tu hniatacuh in um ii.
18 Khuaruah tem te in voi man ngah tuh ii, Ikhalselai mifiim te in tu fiim man ah fiimthiamhnaak ngah tuh ii.
19 Miphalo te khiah mipha te hmaaiah lu kuun in, mithmaai pha ngah duh in ninghio ngeen ii.
20 Mi farah te khiah innhneen tein rin cang ii, Ikhalselai minai in rualpui tampui nai ii.
21 Aang na hiam lekhaw mi farah ninghio tu. Mi zohsuam heh sualhnak ii.
22 Phathnaak caa thu reel lesikhaw, Mi in na um ngaai khaw na zuul tuh ii. Ikhalselai phatlohnaak caa thu reel heh khelhhnaak ii.
23 Naper khung per tu lai cawm duun ben tuh ii si, To kong ai pong li meenma khiah farah hnaak ii. 24 Mifiim te khaih naihhnaak laksawng pe tuh ii. Ikhalselai mivoi te tu amah te voi hnaak in lin thilh ii.
25 Thudik reel thulingpuitu in nunhnaak o tuh ii, Ikhalselai thudon reeltu khiah mi zuartu ii.
26 Pathian kihzahhnaak in pasal pakhat le a innkua te hnen ah, Mah veve umduunhnaak le himhnak pe ii.
27 Thihhnaak an luat na hiam awm? Bawipa kihzah heh nunhnaak cirhti ii.
28 Kumpibawi ai a hu le thawm khiah, A ukhnaak tam le tem thu ah um ii. A ukhnaak um lo fangin amah leek tu zaikhai ilo ii.
29 Dapniu in um lesikhaw mifiim ii si, Ikhalselai thin na com lekhaw na voi laar ruai ii si.
30 Thin daphnaak in tisa cak ruai ii, Ikhalselai iirsihhnaak tu khensar bang ii.
31 Mi farah te reem lesikhaw, Mi farah bawntu Pathian zohsuam ii si. Ikhalselai farah ninghiotu khiah Pathian kihzahtu ii.
32 Mi phalo te tu amah te bawnhnaak thilphalo in hnophnaak ah hleng ruai ii. Ikhalselai mi pha te tu, amah te dikcanghnaak in o ii.
33 Fiimhnaak heh mifiim te thinlung ah um ai, Mivoi te thin songah umhmun nai lo ii.
34 Dikcanghnaak in miphun hon do ii, Sualhnaak in miphun mualpho ruai ii.
35 Kumpibawiin naper kuung te aan ii, Ikhalselai a kuung lo ai naa per te cawh ii.

Thufiim 15 : 1 – 33
15:1 Awka neem ai mi sawnhnaak in thinraw dap ruai ii, Ikhalselai pong ho in thinrawhnaak suak ruai ii. 2 Mifiim te lai in fiimhnaak zaai ruai ii, Mivoi te kaa in voi hnaak suak ruai ii.
3 Bawipa in hmun caang ai thilcanghnaak hmuah hmu sek ii, Phathnaak kin bawn fangin ii seh, siathnak kin bawn fangin ii seh, Kin siik hleen ii.
4 Ninghiohnaak ponkam in thinlung nung ruai leh ii, Ikhalselai ninghiohnaak tel lo ponkam in tu thin khoi ruai ii.
5 Pa thucuukhnaak eeltu khiah mivoi ii, Thucuukhnaak saangtu khiah mifiim ii.
6 Mi dikcang tein a sum le saw khawl ii, Ikhalselai mi phalo in tu harsa hleng fangin lo hmang sek zo hang ii.
7 Mifiim te maan in fiimhnaak pungzaai ii, Mivoi te maan ai pungzaai hnaak ilo ii.
8 Mi pha te sawngeen fangin Pathian aang ii, Ikhalselai mi phalo te hibawlhnaak khiah ningdul ii.
9 Mi phalo te thil bawn daan heh Bawipa in cim ii, Ikhalselai thil dikcang bawntu te iit ii.
10 Thil khelh bawn lesikhaw rohngaai in cawhkuan tuar tuh ii si, Thucuukhnaak na daih hlah lekhaw na thi tuh ii.
11 Mithi khua ai um te khai Bawipa in hmu sek ii, A kontih in, mihing in a khuaruah khiah Pathian hmaai an thup thil tuh ii?
12 Mi hngal tein thu cuuk daih lo ii, Mifiim te ruahhnaak khai zawt awng lo ii.
13 Mihing tu aang fangin mithmaai zal ii, Ikhalselai thasia fangin a thin nau ii.
14 Mifiim te in zir hiam ii, Ikhalselai lungmutlawm te in tu, amah te voi hnaak thawn lungkhim ii.
15 Mi farah te tu thin rimsu in um tio ii, Mi aang te tu nun nuam tio ii.
16 Bawipa kih kong ai temniu nai heh, Lian ai thincawl tio tah in pha sawn ii.
17 Iithnaak te kawm anhnah le anthai ai heh, Cim duun hmun ai sa uur ber ai tah in uur sawn ii.
18 Thincomhnaak in hauhnaak suahpui ii, Ikhalselai thinfualhnaak in remhnaak hleng ruai ii.
19 Thazawng lesikhaw hmun caang ah harsa tawk tuh ii si, Mi dikcang ilesikhaw harsahnaak nai tuh lo ii si.
20 Fapa fiim in a pa aang ruai ii, Lungmutlawm dian in a nu zohsuam ii.
21 Lungmutlawm te tu amah te voi hnaak ah thin nuam ii, Ikhalselai mifiim in tu dikcanghnaak bawn tuh ii.
22 Ruahhnaak tam deuh mi hnen an na lang caang in hlawh na tling tuh ii, Ciatih ai ilo fangin tu hlawh na sam tuh tio ii.
23 A niakhua thawn caang duun ai pong ngah khiah zaizah in pha ii.
24 Mifiim tu thihhnaak lam ah zuk feh lo in, Nunhnaak lamkhung ah hon feh ii.
25 Bawipa in mihngal te inn bal sah tuh ii, Ikhalselai hmaitong thilri khiah kiil sah tuh ii.
26 Bawipa in khuaruah phalo te cim ii, Ikhalselai remhnaak ponkam ah aang ii.
27 Dikcang lo ai hnempuihnak ngah tum lesikhaw, Na innkua buai ruai tuh ii si. Nawhthuh ai mah lai san na sau tuh ii.
28 Mi pha te’n tu mi thu sawn hlaan ah khua ruat hmasa ii, Mi pha lo te’n tu rang roh in sawn de ai thuhnok suak ruai ii.
29 Mi pha te sawngeen fangin Bawipa in ngaai sah ii, Ikhalselai mi phalo te sawngeenhnaak khiah hnawl ii.
30 Mithmaai pha in mi aang ruai ii, Cen thuthang pha in ruh song tian cakhnaak pe ii.
31 Thureelhnaak phatak in hluun lesikhaw mifiim ii si.
32 Zirhtuh eel lesikhaw nangmah veve zainam lo ii si. Thucuukhnaak saang lesikhaw na fiim deuh tuh ii.
33 Bawipa kihzah khiah fiim zirh hnaak ii, Zuulhnaak ngah thai tuh in hniatacuh hmasa tu.
Thufiim 16 : 1 – 33
16:1 Mihing in bawntumhnaak ruat tuh ii, Ikhalselai a tawphnaak ai thunaitu khiah Pathian ii.
2 Na bawn hnaak zongzong khiah pha sek ii tiin ruat tuh ii si, Ikhalselai Bawipa in tu thin song lam siik sawn ii.
3 Na bawnhnaak zongzong Bawipa hnenah pe tu lai, Na thu ruathnaak ah hlawh na tling tuh ii.
4 Bawipa in thil zongzong khiah a bothai in bawn ii, Ciabang in mi phalo ai a bohnaak khiah hnawmcanhnaak ii.
5 Bawipa in mi hngal te cim ii, Ciabang te tu a cawhkuan an luat ruai tuh lo ii.
6 Pathian hnenah kuung roh le ringtlaak in um tu lai, na sualhnaak na hlat sah ngaai. Bawipa thu ngaai tu lai, na kongcung ah phatlohnaak hleng tuh lo ii.
7 Bawipa aang ruai lesikhaw na raal te rin, Na rualpui ah bawn thil tuh ii si.
8 A diklo pui ai tangka tampui nai tah in, A dikcang niu ai hlawh hnaak tangka temniu nai pha sawn ii.
9 Thuruahhnaak nai tuh peu ii si, Ikhalselai na bawnhnaak ah kong na hoitu khiah Pathian ii.
10 Kumpibawi in Pathian huthawm thawn thu reel ii. Amah suahpui hnaak thu te khiah dik tio ii.
11 Cuai le thil tehhnaak te khiah Pathian in dikniu in bawn hiam ii, Zuar hnaak zongzong khai dikcang ai zuar daih ii.
12 Phatlohnaak bawn heh kumpibawi te in daih lo ii, Zaimaan in ii tifangin, uk kho ruaitu khiah dikcanghnaak ii.
13 Kumpibawi in thudik ling hiam ai, Thudik reeltu khiah hmaaipha pe tuh ii.
14 Mifiim in kumpibawi aang ruai caai ii, Kumpibawi raw lekhaw pakhat khat thi thai meen ii.
15 Kumpibawi mithmaai pha fangin nunhnaak um ii, A ninghiohnaak khiah khaal ruah phurtu mairo bang ii.
16 Fiimhnaak heh sui tah in pha sawn ii, Lingthilhnaak heh nguun tah ai riil tuh hnaak ii.
17 Mi pha te in, phatlohnaak pialtu lamkhung hluun ii, Ciamaan in kon lam hluur ing ti phatak in siik tu. Na nunhnaak na o thil tuh ii.
18 Hngalhnaak in hnawmhnaak hleng ruai ii, Tluangkhawnghnaak in khupsukhnaak hleng ruai ii.
19 Farah niu ai hniatacuh ai nung heh, Mi hngal te kom ai a thil ruhnaak ping ve tah in pha sawn ii.
20 Na cuukhnaak phatak in hluun tu lai hlawh na tling tuh ii, Bawipa ringtu lai na aang tuh ii.
21 Lungmu fiim te heh thil thia thiamtu ii, Awkaa hlum in mi zeel thai ii.
22 Mifiim te caa fiimhnaak heh nunhnaak cirhti ii, Ikhalselai lungmutlawm fiim cuuk tum khiah a cuu bo lak meenma ii.
23 Mifiim te in pong hlaan ah khua ruat ii, Ciamaan in a ponghnaak heh a tha haat ii.
24 Ninghiohnaak ponkam khiah khoiti bang ii, Kaa songah hlum ai, nuncakhnaak caa pha ii.
25 Lam dik ii ti ai na ruah hnaak khiah, Thihhnaak na hlenpuitu lampui ii thai zeel ii.
26 Napertu khiah a rong caak hnaak in naa tam deuh per ruai ii, Zaimaan tifangin a rikaamhnaak khiah riam ruai nuam ii.
27 Mi phalo tein tu, mi te harsahnaak pe tuh in lamkhung sii ii, Amah te ponkam in rin mi kaang ii.
28 Mi phalo tein siatdunhnaak zaai ruai ii, Harsahnaak suak ruai ai, rualpui pha te rin kheek ruai ii.
29 Mi thinsalpa tein a rualpui te zawl ai, Siathnaak lam ah hoi ii.
30 Mit na khiap le kaa na lihtu te raalring tu, Zaimaan in tifangin phatlohnaak khuaruattu ii.
31 Sansauhnaak heh mi dikcang te ngah vo ii, Puakpaar heh songlawihnaak lukhuk ii.
32 Thinfual khiah thahaat tah in pha sawn ii, Khualian khua uk ben tah in, mah veve uk ben khiah a pha sawn ii.
33 Pathian bawntumhnaak ling tuh in camfung duuk ii, Ikhalselai a thusawnhnaak tu amah Pathian in lo reel ii.
Thufiim 17 : 1 – 28
17:1 Remduunlo inn ai puai sim tah in, Thin dap niu ai tawhkhing khal khat ai pha sawn ii.
2 Sal fiim in a bawipa fapa zaitlaaklo kongcung ah Thu nai ngaai khaw ro haatlam khai co tuh ve ii.
3 Sui le nguun te heh mai in cuul ii, Mihing thinlung tu Bawipa in cuul ii.
4 Mi phalo tein khuaruah phalo hluun ai, Thudon tein thudon thu khiah ngaai ii.
5 Farah zohsuam lesikhaw a seemruaitu Pathian zohsuam ii si, Mi bawngsia tawk fangin iim lesikhaw cawh tuar tuh ii si.
6 Hausa te bawi lukhuk khiah a tu le a faa te ii hang, Naupang te songlawi ruai hnaak tu, a nu le a pa ii.
7 Zuul tlaak tein thu don lo ii, Lungmutlawm te in hnempui hnaak thu reel tuh nai lo ii.
8 Mi haatlam in nawhthuh heh mitkher bangin sinsa thil tuh in ruat ii, Zaizongza bawn thil tuh in um ii.
9 Mi in I iit sehlai ti na daih lekhaw, Mawh fangin a mawhhnaak hlat sah tu; Mawhhnaak hih sah tio fangin rualpui thawn kheek thai ii.
10 Mivoi vai zakhat viit tah in, Mifiim vai kkhat hau hnaak in hlenben sawn ii.
11 Harhnaak suak ruai tio mi phalo te hnenah, Thihhnaak khiah zualkotu bangin hlat ii tuh ii.
12 A faa sut hnaak vompui tawk heh, Mivoi naper hnokli teng tawk tah in pha sawn ii.
13 Phathnaak khiah phatlohnaak thawn ruultu khiah, Phatlohnaak a inn an suak tuh lo ii.
14 Hauhnaak pan heh tizu khamtu keh ngom thawn bang ii, Tawng duun hlaan ah com tu.
15 Mawhlo te mawhhluuk ai mi phalo te mawhlo ai bawn heh, Bawipa cim hnaak ii.
16 Mivoi fiim zirhhnaak tuh ai tangka tampui hmang heh zai hnempui pa? Zaimaan in tifangin, fiim tuh hluan lo ii.
17 Rualpui pha in iithnaak laar ruai tio ii, Harsa fang ai kin bawm duun lo fangin u le nau ihnaak zai hnem pa hang?
18 Khuaruah nailo mivoi ian in mi laiba hnaak caa thu lo khaam ii.
19 Sualhnaak daih heh harsahnaak bawn nuam ii. Tluangkhawng hnelhno lesikhaw harsahnaak ko thawn bang ii.
20 Thin phalo mihing khiah a lampui tluang lo ii. Mi zawlthai lai khiah hnophnaak songah tlok ii.
21 Fapa voi in thasiahnaak suahpui ii. Fapa voi naitu khiah aang lo ii.
22 Thin aanghnaak khiah sii pharoh ii. Thin harhnaak in ruh ro ruai ii.
23 Dikcang lo thukhantu tein tu, Nawhthuh ai maan in a cangniu in thu reel lo ii.
24 Mifiim te in thil pha bawn tuh ling ii, Ikhalselai mi voi te tu a thin kaakaa ii.
25 Fapa voi in a pa hnenah thinrimhnaak hleng ruai ai, A nu khiah thin rimsu ruai ii.
26 Mawh nailo cawh heh phalo ii, Mi pha te viit heh phalo aam aam ii.
27 Mifiim te in pong tam cel lo ii, Dapniu ai umtu khiah thilpha hmu thiltu ii.
28 Mivoi rin in dapniu in um ai a kaa ciip lekhaw, Mifiim camra in dah thil ii.
Thufiim 18 : 1 – 24
18:1 Aisu khai kom hiam lo te heh, Mah daihhnaak leek ngaaisungtu ii. Mi ai pha ti hnaak saang thil lo ii.
2 Lungmutlawm in thu ling le ling lo khiah thupui in ruat lo ii, Zaizah I fiim ti laar ruai tuh leek hiam ii.
3 Sualhnaak le zakthih hnaak heh feh kawm betbo ii, Zuulhnaak paai ruai lesikhaw a tumruul ah zohsuamhnaak ngah tuh ii si.
4 Mihing ponkam heh fiimhnaak ham ii thai ii, Tipuithuanthum bangin thuuk ai, Ti zu beetbo ruun bangin thar tuh tio ii.
5 Mi pha lo mit hmaai pe khiah dik lo ii, Mi dikcang te mawh ruai khai dik lo ii.
6 Mivoi kahmuur an hauhnaak suak ii, A kaa in tawnghnaak ko ii.
7 Mivoi pong fangin amah veve hnawmcan duun ii. A pon in amah lala awk ii.
8 Mi siat heh uur roh ii, Hlum roh ii ai lem sek ii sing.
9 Thazawng heh mi hnawmcantu bangin phalo ii.
10 Bawipa tu a kho roh khaakber hmun inn saang roh ii, Mifiim te ciata feh ai him ii.
11 Minai te in sum le saw khiah himhnaak ii ti in ngaaisung ii, a saang roh a kho ngaai khuapui kulh hnaak vingpui vuah ii.
12 Aisu khai hniatacuh ben hlaanlo zuulhnaak ngah tuh lo ii, Mi hngal te khiah hnophnaak kong ah um ii.
13 Thu na sawn hlaan ah phatak in ngaai tu. Ciatih in bawn hlah lesikhaw mivoi na cang hluan ah, na sawn hnaak pa zohsuam ii si.
14 Mihing thinlung in uurhnaak an ben ii, Ikhalselai thin khoi tu aisu in tuar ben pa?
15 Mifiim te in tu zir hiamhnaak thinlung nai tio ii.
16 Mi thupui tawk na nuam awm? Thil suumpha keng tu lai bainiu in tawk thil tuh ii si.
17 Thukhanhmun zung ai thu reel hmasaber tu khiah mi dik ber baang ii, Ikhalselai a baanghnaak khiah amah thu eeltu ai thu zawt dekdo acuu tian leek rai ii.
18 Thu ling roh veve pahnih thukhanhmun zung ah thu eel duun lekhaw, Camfung ian in thu khan thil ii.
19 Na unau bawm tu lai, ani in khuapui ving kho roh bangin na hup tuh ii. Ikhalselai hau le sikhaw dawng na khaam tuh ii.
20 Na ponghnaak ai suak ruai hnaak nun bangin nung tuh ii si. 21 Na ponkam in na nunhnaak a o thil bangpah in hnawm khai hnawm ruai thai ii. Ciamaan in na ponkam maan ai hleng hnaak thil te khiah tuar ben kuul ii si.
22 Nupui nai heh thil pha tawk ii si, Ciami in Bawipa phathnaak na vum ah laar ruai ii.
23 Farah pong fangin a ngeen niu in ngeen de ii, Ikhalselai minaipa in tu awka ho roh in mi sawn ii.
24 Rualpui haatlam tu camkhat song leek rai ii, Ikhalkhaw unau tah ai phasawn rualpui khai um ii.

Thufiim 19 : 1 – 29
19:1 Farah dikcang khiah mivoi awkrawl tah in pha sawn ii.
2 Linhnaak nailo ai daih leek daih li heh pha lo ii, Thin fual lo hnaak in harsahnaak ah na hlenpui tuh ii.
3 Mihing in amah voi maan in hnophnaak tawk de ii, Cia fangin Bawipa mawh hluuk ii.
4 Minai te in rualpui thar tampui nai ii. Ikhalselai farah te in tu rual naih sa rin khawl ben lo ii.
5 Thukhanhmun zung ah thu don lesikhaw, Cawhkuan tawk tuh ii si, na luat tuh lo ii.
6 Mi tampui in mi thupui te mithmaaipha ngah tuh caai ii, Mi rawlthiam caa tu aisukhai rualpui pha ii sek ii.
7 Farah tu a suahpui unau rin in hnawl de ii. Rualpui meenma tein tu kontih in hlum lo in um aam tuh ii. Kontih bang ai ko leh li inkhai let nawn lo ii.
8 Nangmah veve daih duun tu lai, Fiimhnaak khiah na thiam tawp in zir tu. Na zir hnaak khiah hih tu tio lai, Na thil bawn hnaak ah hlawhtling tuh ii si.
9 Thulingpuitu diklo khiah cawhkuan luat tuh lo ii., Thudon reeltu khiah hnawmral tuh ii.
10 Mivoi khiah nunnuam roh ai nung tuh tlaak lo ii, Sal ai a bawi uk tuh khiah tlaak aam hlah.
11 Na fiim lekhaw na thin uk ben tuh ii si, Mi mawh hlat sah heh songlawi ii.
12 Kumpibawi thinraw heh kiosa huuk bang ii. Ikhalselai a ninghiohnaak heh hampa vum ai naidawh bang ii.
13 Fapa voi in hnawmral hnaak ah a pa hlenpui ii. Awlcom lo ai phunciar thai nupui khiah a cat lo ai sii hnaak ruah bang ii.
14 Inn le sumsaw te khiah nu le pa hnen an ngah hnaak ro ii, Ikhalselai nupui fiim tu Bawipa hnen an ngah hnaak ii.
15 Thazawng in it meenma tio lesikhaw, Rii na kaam tuh ii.
16 Pathian thukhaam hluun tu lai san na sau tuh ii, Zainam loin um lesikhaw na thi tuh ii.
17 Farah kongcung ai ninghio nai khiah Bawipa hnen ai thil pe bang ii, Bawipa amah in na pe leh tuh ve ii.
18 Na faa te a seen lai pah thu cuuk tu, Reel lo fangin tu amah te veve hnawmcan duun tuh bawm ii si.
19 Thinraw roh zetu khiah cawhkuan tawk tuh ii, Harsahnaak songan vai khat o khal silai, o not na kuul tuh ii.
20 Khuaruah pe hnaak ngaai zuam in zir nuam lesikhaw, Ni khatkhat ah tu mifiim cang tuh ii si.
21 Mihing in tu a thin in bawntumhnaak ruat tuh napui ii, Ikhalselai Bawipa reel hnaak ian bawt ii tuh ii.
22 Pamhap heh zakthihkuul ii, Farah te heh thudon reeltu tah in pha sawn ii.
23 Bawipa kihzah tu lai san na sau tuh ii, Hnawmralhnaak tawk loin na muang tuh ii.
24 Mi haatlam tu thazawng ze maan in, Kaa song ai rong baar rin zuam lo ii.
25 Mi hngal cawh tu lai, khuaruah tem tein fiimhnaak ngah tuh ii, Mifiim thu cuuk tu lai fiim tuh aam aam ii.
26 A pa viit ai inn an a nu hnawntu fapa khiah, Zakthih le mualpho um ruaitu ii.
27 I fapa, zirhhnaak com le sikhaw na linsa khiah hai leh tuh ii si.
28 Mi hnophnaak leek ngaaisungtu thulingpuitu hnenah thudik um lo ii, Mi phalo tein sualhnaak bawn hiam ii.
29 Mi hngal te in vih tawk tuh ii. Mivoi te tu vih hlawh tuh ii.
Thufiim 20 : 1 – 30
20:1 Zu ding heh mi zohsuam tawk hnaak ii, Pong tam ruai ai hauhnaak suak ruai ii. Zu kham heh voi hnaak ii.
2 Kumpibawi thinraw khiah mi ngertu kiosa bangin lau tu; A thinraw ruaitu khiah mah veve reek thawn bang ii.
3 Zaibang mivoi inkhai hauhnaak suak ruai thai ii, Hauhnaak cang ben heh zuul tlaak ii.
4 Faang pawi cuu ai lo vaai thazawngtu khiah, Rongkhawm cuu fangin rong khawm pha nai tuh lo ii.
5 Mihing in a thin song ai a naih hnaak khuaruah khiah namkum thuuk song ai ti thawn bang ii. Ikhalselai mifiim pa in khaai in suak thil tuh ii.
6 Aisu inkhai mah kuung hnaak thu reel teen ii. Ikhalselai a kuung peupeu aisu tawk ni sing?
7 Pa heh mi dikcang le mi kuung ilekhaw, A faa te bawngpha ii.
8 Thukhanhnaak tohkham ai totu kumpibawi in, Thil pha lo zongzong a mit in thia thil sek ii.
9 Aisu in, “I khuaruah ciang ruai zo ing, I sualhnaak ciang zo ii,” ti thil ii si?
10 Bawipa in cuai le thil tehhnaak dik lo te cim ii.
11 Naupang rin in a ihnaak khiah a bawn hnaak in laar ruai ii, A dik le diklo, a pha le phalo ling thil ii si.
12 Khua hmuhnaak mit le khua zaahnaak bil heh Bawipa in kin bawn sah ii.
13 Na tikcu hmuah it le mitmu in bo ruai lesikhaw farah tuh ii si, Naa per tu tio lai rong tampui nai tuh ii si.
14 Thil laitu in, “Thil man khung ze ii,” tiin cam de ii. Ikhalselai thilri lai ben feh hnua ah tu, “A bai roh in lai ing,” ti ii.
15 Sui tampui um ii, lungvaar khai tampui um ii, Ikhalselai fiim ponkam khiah a man khung sawn ii.
16 Lin awng lo hnaak pa caa thu khaam sah tu khiah, A thilri thukhaamhnaak caa langsah tuh ii.
17 Dikcang lo ai ngah hnaak rong uur ii, Ikhalselai zaicamlo pah a kaa songah siatnawi bang cang tuh ii.
18 Khuaruah pha naitu thu lang tu lai, Na thil bawn hnaak hlawhtling tuh ii. Phatak ai pai rinrian lo pah raal tawng mah.
19 A thupniu ai mi reeltu in thupruuk thu phuang de ii. Ciaiimaanin, mi reelthai khiah kom mah.
20 Na nu le na pa awrsiat lesikhaw, Khuathim lak ai maifaar dit bangin na nunhnaak bo tuh ii.
21 A baainiu ai na ngah hnaak sumsaw khiah na caa hnempuihnaak tem tuh ve ii.
22 Phatlohnaak khiah phatlohnaak thawn ruul mah, Bawipa ring tu lai na o tuh ii.
23 Cuai le thil tehhnaak diklo hmangtu te Bawipa in cim ii.
24 Kal kin suan ruaitu khiah Bawipa ii, Kin feh hmun tuh lamkhung kontih in ling thil tuh ii sing?
25 Pathian hnenah pe tuh ai thu na tiam hlaan ah phatak in ruat hmasa tu, Cialo fangin na sir leh thai ii.
26 Kumpibawi fiim in misual khiah sii ai ninghio loin cawh de ii.
27 Bawipa in khuaruah le asia-apha thia thiamhnaak lungmu kin pe ii, Kin thinlung an konnah relh thil tuh ii sing?
28 Kumpibawi in a kuung, a pha le dikcang niu in uk lekhaw, a uk hnaak kho tuh ii.
29 Khangngom te songlawihnaak heh thazaang ii. Hausa te mawihnak heh a puakpaar ii.
30 Kin ziaza thuul thai hnaak tuh in Ni khatkhat ah harsa tawk kin kuul ii.