Kawlram Ambassador Hau Do Suan le Ottawa ai Chin mi te tawkdunhnak nai
Ambassador Hau Do Suan le a innsangnu
July 6, 2013 nia ah Canada ram ai Ottawa khuapui ah Ottawa Chin Community (OCCC) pawlkom konghoihnak in Ottawa ai Chin upa te pawl thawn Canada ram ca Kawlram palai Hau Do Suan le nupui thawn, a rualpui te thawn zanfak aitlanghnak nai kongin thula reltlanghnak nai ii.
Mbassador Hau Do Suan heh Chin Kawlram ca Chin mi songin Kawlram in zalenhnak 1948 kum in a ngah hnua Kawlram Ambassador per ngahtu 4hnak ii. June 10, 2013 nia ah Canada ram ai lu ber David Johnston, Governor General of Canada hnen in lungkhimhnak in Canada ram ah Kawlram palai (Ambassador) dinhmun ngah ii.
Hau Do Suan heh Chin State ai Tedim peng ai Ciingpikot khua ah suak ai Lee Kuan Yew School of Public Policy an graduate le Kawlram ca Ministry of Foreign Affairs (Political Dept) ah Director General per awng ii.
Ambassador Hau Do Suan le Ottawa Chin Community Centre (OCCC) konghoitu te
Chin mi songin Kawlram Ambassador ngah awngtu te tu, Vum Khaw Hau, Za Hre Lian le Tluang Hmung te pawl ii. Kum 40 liam hnua fang ian in tun heh Hau Do Suan hmangin Chin mi songin Kawlram Ambassador dinhmun ngahtu umh leh hnak ii.
Canada khuapui Ottawa ai Chin Community in Pu Hau Do Suan caanghnak le tawkhnak heh Ottawa ai Chin mi in dinhmun dawr (Restaurant) Rangoon Restaurant ah Ottawa ai Chin mi kum upa le konhoitu te pawl sawm in zanfak ai tlang kongin thu nuam reltlanghnak nai ii ing.
Hetih bang ai Ambassador Hau Do Suan thawn tawkdunhnak ah a nupui le a naperpui Kawlram palai 2 in tel pui ii. He tawkdunhnak ah Hau Do Suan in hetin thucah rel ii.
“Kawlram heh President U Thein Sein konghoihnak hnia ah kum 50 lai ram buai le harsa in kin umhhnak heh democracy lam pan in tun naai kum rai lo niu songin tampui khangsohnak nai zo ii sing. He tlukin kin zuamhnak le tumtahhnak heh a hnawm tuh saal siang lo ii ing. Kawlram ah tunhlan ah Federal Democracy tihnak rel ngam de lo hnak tun tu thuthang le media te khai zalen roh hang ai mi hmuah in Federal tihnak ling pan hang, rel ngam hang, kin daih tlang hang ii. Ramdang ai umhtu unau te pawl in Kawlram lam ai kin unau le cang thil tawpin kin siikhnak heh kin khua le ram ca naperhnak le bawmhnak pah ii.” tiin mipui hmai ah ah rel ii.
Cen, tun pah in ramdang ai ram mi (Citizen) ihnak nai zo Kawlram mi cia te pawl ca Kawlram ah tlung in umh thilhnak tuh in Permanent Residency (PR) khai bawn tuhin acozah lam in cang thil tawpin bawn sah tuhin khuaruathnak umh zo ti ii.
He tawkdunhnak ah mi tam sawn in Kawlram thula te rel lianglo lakah Ambassador ai innsangnu in tun kum heh Kawlram ah Dr. Adoniram Judson hihhlenhnak kum 200 khimhnak ii le hetah lam pawl in khai cang thil tawpin kum 200 khimhnak program ca mah siang zah sumsaw in bawm tlang tuhin mipui te sawmhnak nai ii.
