Pakaap ai pha ze lo ii

Laitlang ai suak te in Pakaap (Mumiang tiin khai ko de ii) kin duh roh ai, kin memeh le tihaang ah pakaap telh kin tam ii. Vuan ah khai pakaap pawi tio ii sing. Pakaap kin duh roh maanin a phahnak le pha lohnak ling tlang pha ii.

Pakaap Phahnak

Pakaap ah nuncakhnak tam ngai tel ii. Khuat hrek (1/2 cup) dung pakaap heh nikhat ca na kulhnak Vitamin A tel ii. Cen nisiar na kulhnak thiirdaat (iron) khai 20% heh pakaap khuat hrek ai le sikhaw na ca zo ii. Ikhalkhaw pakaap heh tam ze ai le singkhaw a phat lo hnak tam ngai umh ve ii.

Pakaap Phalohnak

1) Tiksa in a kulhnak lang thil lo

Pakaap ah oxalic acid tam ngai umh ii. Oxalic acid heh iron (thiirdaat) thawn kopdun fangin kin tiksa in thildang a kulhnak te lang thilhnak tlawm ruai thil ii. Ciamaan pakaap ai fangin kin tiksa in a kulhnak thildang te kham tuh loin vitamin C ai tel kul ii. Vitamin C ngah tuhin lingmaw ti (Orange Juice) ilo lekhaw bokkhek ti (Tomato Juice) ding tel kul tio ii.

2) Kal (kidney) ah Lungto umh thai

Na kal (kidney) ah lungto umh thai lekhaw na doctor (sayawan) in pakaap ai na siang tuh lo ii. Pakaap ah purine tam ngai tel ai cia heh na tiksa song ah uric acid ah cang de ii. Uric acid tam lekhaw kal song ah lung umh thilhnak sang roh ii. Pakaap ai oxalic acid in na zun (urine) ah calcium oxalate khang ruai thil ai cia hmangin na kal ah lungto khang ruai thai ii.

3) Kam riim hiam

A laukul lo napui pakaap ai maanin na kam heh a riim hiam caangce tuh ii. Pakaap ah oxalic acid tam umh maanin canghnak i. Oxalic acid ah lungto bang crystal niuniu umh ai cia heh ti (water) ah zop thil de lo ai kin kam ah taang de ii. Kam nawt fangin he lungto bang kambeh te pawl heh ciang ruai thil ii.

4) Song uur thai

Pakaap ah fiber tam ngai tel ii. Pakaap an khuatkhat song ah fiber heh 6g tel ii. Na tiksa in fiber kuul napui tam ze ai lekhaw pumpui hiam lo ai song urr thai ii. Ciaman pum ah hlivua tam, songpuar te bang cang thai ii. Pakaap tam roh vaikhat ah ai dek le singkhaw sor thai kio ii. Pakaap ai caangin ti (water) khuatkhat ding tel tu tio lai na song ah fiber te pawl pha ngaiin kial thil tuh ii.