21 October 2011
Tun dung Southeast Asia khawmual ah tun hlan bang loin ruah tam ze in si le Kawlram ai ramsong lam ah roh ngai in ti lian le harsahnak tam ngai hleng ii.
Tilian man’n mi 200 dung a paai maw thi tih lin loin um le a hlaice in Magwe Division song ah rauh ber ii.
Pakkoku ah inn 50 dung heh ti in laan sek le police in mithi ruang 38 tawk zo thu phuang i. Mi 150 ruang tun tian tawk lo ii. Inn beuh niuniu heh 300 dung hnawm sek zo ii.
Pakkoku an peng 50 dung ai khua 30 dung khiah tilian in roh ngai in buai le a he hmun ai tiluanghmun Yaw Creek khai tii liam ii. Yaw Creek hmun ah 21 Oct, 2011 nia zinglam 2am ah tii lian ze le thingkung te khai sawn ai mi thawng tam roh tlan ii.
Magwe division song ai Sinbyugyun khawpui hiang ai khua ciik deuh 20 dung khai tilian in buai i. He hmun ai tikhawlhnak Lin Zin Dam khai hnawm le a hiang ah tii liam sek i. Lo le ram te khai tii in dim sek ii.
Hetih teng fangin innhnen Thailand ram khai kum 50 song ah tun tum heh tilian in a buai ber teng ii. Amah te in mi 350 thi zo ti in thuthang umh le Bangok khawpui khai tilian in buai roh ii.