Tun naai ah Chin National Front (CNF) le Kawlram acozah in remhnak a bawnhnak in Chin State song ah rampua lam in bawmhnak hleng tam te te tuhin ruathnak umh ii.
CNF le Kawlram acozah in laai ah thil 9 lungkhimhnak ngaan tlang ai cia te song ah Chin State heh Special Economic Zone (SEZ) in dah tuh tihnak tel ai saklam ram tian in sumpaihnak lam hleng ben tuh bang dinhmun ii.
Dr. Sui Khar in “Chin State heh Special Economic Zone (SEZ) in cang lekhaw ram song in suakhnak thil te heh sumdawnghnak tian in cang tuh le naper tam tuh ii. Inapui Chin State ah sumdawnghnak khangso lekhaw ramdang mi hlengin kin buai thai, ram song thingkung le lailung umhdaan te khai danglam ruai tuh maan ralring kuul tuh” tiin reel ii.
He lungkhimhnak ah acozah lo pawlkom (Non-Governmental Organization/NGO) te heh zalen ngai in Chin State ah farahhnak, nuncakhnak le fimthiamhnak lam na per thil tuh ii.
Jan. 11, 2012 nia ah Refugees International (RI) in EU, UK la US acozah te hnen ah Kawlram ai nun harsa hmun ram ah bawmhnak khangso ruai tuhin ngenhnak bawn zo ii.
UK ai Department for International Development (DFID) ai lu ber Paul Whittingham in, “£10million heh project ciik niu niu ca Kachin, Chin, Rakhine, Shan state le Irrawaddy ai hmun ro ram dung te khiah bawmhnak pe tuh” tiin phuang zo ii.
2008 kum ah DFID in Chin State ah paam tlung fangin sumpai in US$ 1 millions heh UN agency te, UNDP le WFP te hmangin bawn zo ai, he bawmhnak heh Chin mi upa te in London ah DFID ai Deputy Director thawn tawkdun in canghnak ii.
2011 kum ah India acozah in Chin State ca US$ 8 million man nuncakhnak, lamkhong le tlanglenghnak lam ca bawmhnak suah zo ii.
2011 kum ah Hakha ah CNF le NGO palai te pawl in meeting-hnak bawn tlang le Chin State ah acozah thawn buai tuh loin naper tlang tuhin sawm dun cia zo ti ii.
Hetih bangin Chin State heh khangso rianro napui tun dinhmun ah ramdang mi te in Kawlram tlawn lekhaw Chin State song lut thil lo ai hlanglam ram tlawm dung ian tlawn thil in umh ii.