Kachin ram ai Myitsone tikhuah (Dam) project heh acozah in com zo napui he hmun hiang ai khua le mipui te heh hmun dang ah thawn tuhin acozah in thu suah pah tho tho ii.
He thusuak heh March ni 6 ah acozah in phuang ii. Acozah thusuak hlun lo te tu a inn bal sah tuh, thawng to tuh tiin he hmun ai daan lam mithiam in reel i. Inn bal sah heh he hmun ai Kachin Church le Baptist temple te ian luat tuh ti ii.
Kachin Development Networking Group (KDNG) ai NGO napertu pakhat in Myitsone hmun ai acozah le mipui inn te heh acozah in siatbal sah sek ai, mipui te lel thil tuh loin bawn ti ii.
Acozah in thusuak hnawtaber suah le March ni 17 hlan ah Tang Hpre khua heh thawn ruai sek ai, mipui te tu zai bawn pha ling loin thinhar in om tlang ii.
March ni 5 nia ah Kachin Roman Catholic kohran ai Metilah (Nun) 20 heh acozah in pom ii. Rai thah thu zawt leh hlat leh ii.
Zarh hmasa ah Tang Hpre khua te in tlawngta hmingthang Min Ko Naing heh he khua ai sawngenkhawmhnak ah sawm awng ii. Min Ko Naing le amah thawn naperpui te in acozah hnen ah he khua mipui heh amah te inn lo ah tlung thil tuhin reel ve ii.
2010 – 2011 kum song ah Myitsone Tikhuah ca he hmun ai khua 5 heh thawn ruai zo ii. Khua 5 song an 3 heh acozah in bulldozer tank hmangin rawt sek awng zo ii. Cia bang pah in tun khai Tang Hpre khua heh acozah in ti thai ii.
President Thein Sein in Myitsone Tikhuah (Dam) heh com rih tuhin thu suah zo napui tawlreltu te in China thawn naper tlang pah thotho le he hmun ah electric transformer te khai Nawng Hkying khu ah bawn pah hlen ii. Chinese company napertu te khai he hmun le Myitkyina ah tun khai om hlen ai naper hlen pah ii.