U.S ai NGO hmingthang pawlkom te in Mizoram ai Chin mi 100,000 te heh refugee ihnak pe tuhin au pui ii.
He NGO in report pakhat “Seeking Refuge” tihnak suah le, Washington ai National Press Club ah tlangzarh ai he report ah Kawlram an nitlaklam India ah Chin mi thawng tam roh inn le lo nai loin zohsuam phuncang a tuarhnak te telh le Kawlram ah acozah zohsuamhna tuar thil loin tlaan te tiin phuang ii.
InterAction pawlkom ai vice-president Joel Charney in, Mizoram lam ai Chin mi pawl heh tun hnua lam tian ah amah te ram ah tlung tum lo pawl ii, tun naai ai Kawlram danglamhnak maan khai tlung hiam tuh cuang lo pawl ii. India acozah in khai he Chin mi te ca a ngenhnak heh pomsah tuhin ruathnak nai tiin reel ii.
US human rights lawyer Matthew Wilch in, he report laaihmai 135 ah Mizoram lam ai Chin mi te heh harsahnak phuncang tawk ii le acozah ah zai khai lingpuihnak nai loin umh ai daan loin mi ram ah umh cang le zohsuamhnak tam ngai tawk de ii. He mi te pawl heh acozah in lingpuihnak nai lo maan laivum in khai amah te thula le dinhmun ling thil loin umh ii, tiin phuang ve ii.
Zo Tum Hmung
Washington ai Chin community song ai konghoitu pakhat Zo Tum Hmung in, Mizoram acozah le India acozah vum ah he hmuah Chin mi te amah te ram ah umh siang maan a ram mipui te hnen ah aanghnak tampui reel i hiam, ti ii.
“Mizoram ai Chin mi te ca a cak thai ber in na per kin kuul, bawm kuul hang, laivum in buapui kuul” tiin US Conference of Catholic Bishops ai Migration and Refugee Service ai director Johnny Young in phuang ve ii.
USA ai Refugee Council ai chairman Dan Kosten le InterAction ai president Sam Worthington te in, Mizoram ai Chin mi heh fimthiamhnak, aihdin, nuncakhnak le humhimhnak lam ah harsahnak roh ngai in tuar le hetah Kawlram ah hleng thar mino te khai Kawlram acozah ralkap ai zohsuamhnak tuar in hleng te khai umh bial tiin phuang ve ii.
He NGO pawlkom te in US Congress le State Department tawk tuhin tumtahhnak nai le India acozah ah nor sah tuhin ruathnak nai ii.
Hetih bang ai Mizoram lam ai Chin mi te harsahnak heh India acozah in he ram ah ramdang mi tlawn thilhnak daan a bawn hnua ah tun ai NGO te in tlawn le laivum ah phuang thil lai ii.
He report ah Chin mi in ram naitu ihnk (ethnic), politics le biakhnak lam ah zohsuamhnak phuncang Kawlram ralkap acozah lak ah tuar te pawl ii tiin ngan ii. Cen, Chin te pawl heh, he ram ah daan loin lut ramdangmi tiin zohsuamhnak tuar fawn ii. Mizoram ai Chin mi pawl in refugee ihnak dinhmun bangin humhimhnak co thil lo ai, India acozah lam in daih bangin pom, ai ramri ah kuat de tiin phuang ii.
Mizoram ah Chin mi te heh he ram ai mi te bangin vantlang (public) in ngah thil hnak tii le rong heh India acozah lam in co thil ve lo ii. Rong aihdin harsa ngai le naupang niu niu khai tlawng kai thil loin naper kuul in nung tlang tiin ngaan ii.
He report ah NGO te in a umhnak tu India acozah le Mizoram acozah in UNHCR thawn naper tlang tuh heh lungkhim hlen i maan ramdang ai acozah te sawn in lingthiam sah in Mizoram ai Chin mi te ca cang thil tawp in bawm tuhin ngen ii.
He thula heh 2011 kum ah U.S ai Chin mi song in pu Zo Tum Hmung le NGO palai te thawn India tlawn teng ah Mizoram a tlawnhnak in tun bangin Report suak thil hnak ii.
U.S ai NGO hmingthang pawlkom te in Mizoram ai Chin mi 100,000 te heh refugee ihnak pe tuhin au pui ii.
info