Salai Thangte: Tundung Falam Fehdan (Falam Movement)

Salai Thangte: Tundung Falam Fehdan (Falam Movement)

Tundung Falam Fehdan (Falam Movement)

– Salai Tluang Kip Thang (Salai Thangte),

Ottawa, Canada

 

Tundung Falam peng naperdan le fehdan heh hlirdan phuncang umh tuh napui tun ai fehdan heh Exclusion and Noncooperation Movement ti thil ii sing.

Zaimaan hetin ti thil ii sing? Tundung Falam fehpui tlawm dung hlir nga sing.

 

1) CCOC

tktTun avai2hnak CCOC (Chins for Christ in One Century) bawn tuhin Chin mi Khrihfa lam in konghoitu le pawlpui te pawl in Chin ram ngaihhar maanin fehpui tuh ii. Inapui CCOC ah Falam lam tel hiam lo ai Hakha politics tiin Falam mi tel tuh loin thu bawn ii. Falam (Laizo) pon in Bible kin bawnsahtu Dr. Hre Kio rin ponka sia rohin Falam lam in Group mail ah zohsuam ngaiin lai nganhnak siar pha tam ngai umh ii. Dr Hre Kio in Chin mi song ah cang thil tawpin daihsah bul umh loin Dictionary te pawl khai Falam (Laizo) in suah tuhin a daihtu ber khai i napui Falam mi rohin ruatdun te pawl in thil pha in hmu hiam ngal lo ii. Hetin CCOC in Chin ram Veilam (Southern) le Asho lam tian in Pathian thuthangpha phuang in Chin mi hmunkhat ah umh tlang thil tuhin na per pan zo ii.

 

CCOC ah Falam lam in tel hiam lo, tel tuh lo tihnak heh khangsohnak maw kontin i ni? Tunteng Kawlram lam khai, ramdang lam khai Falam le Hakha heh a zuamdun le tawngdun hiam in ngiar dun sinsin ii. Chin State Capital heh Hakha in kin lang sah zo maan Chin official pon heh Falam pon i thil tuhin le lar tuhin politics lam le media lam in zuamdun sinsin ii. Inapui CCOC ah Falam tel hiam lo hnak heh Falam pon lar lohnak sawn ah cang tuh sawn ii. Hakha pon hmang te pawl sawn in Bible le Laa te pawl heh amah te pon in hmang tuh le Chin mi tam sawn in Falam pon hnak tah Hakha pon thiamtu tam tuh sinsin ii.

 

2) Saikhumphai thula

Mizoram (India) ah Saikhumphai khua ai inn veksen Mizoram mi in mai taaai sah ber ai Chin mi inn le lo nai lo, harsa tuar te bawm tuh thula ah Relief Committee dinh thula ah Falam lam thufehdan heh a pha lo ii.

 

Aizawl ah Relief Committee heh Hakha lam in sawm le Falam lam tel hiam lo ai, hnuata ah ICA (Institute of Chin Affairs) hmingin Falam lam in Relief Committee a dang dinh ii. Umhdan tu harsa bawmdunhnak menma ah rin Falam le Hakha bawmdun tuh lo per tlang tuh lo tihnak ii.

3) Chin New Year

 

Falam lam in New New Year tihnak heh a tharin hmang hmasaber ii. Chin New Year ti napui Falam peng song ian huap ai, bawn tlang de ii.

 

Ottawa (Canada) ah Chin New Year ah Chin mi veksen sawm in bawn tlang hiam lo ai, thu bawn liang, program bawn liang hnua ianin mi rel de ai sawm de maan Falam mi ian tel de ai, cia lak songin Zanniat lam tu Chin mi tawkdunhnak le lungrualhnak in hmu lo maan tel kin hiam lo ii.

4) Kinmah song ah Democracy le Federalism

 

Kawl acozah lakah Kawl in thil 1 ngah lekhaw Chin in ngah tuh ve tiin, Quota system in covo ngah hiam in tunnia tian Democracy le Federal thula Politics ah thupui rohin fehpui teng ii sing. Kawl acozah lakah Democracy le Federal daih napui singkhaw kinmah song ah tu Ralkap Acozah bangin fehpui pah ii sing.

 

Thuthimhnak ah kin Canada ah Falam Pawlkom dinh ai a dinhtu te in amah te daihnak heh khua/Province pakhat ca hotu ah ril ai Falam peng mi veksen uk hiam ngio ii. Delhi ah tunhlan Falam Union tihnak pawlkom ah Zanniat le Ngawn tlangtluan mi tu Falam mi ngaingai lo bangin hlaihdanhnak tampui umh awng ai tun heh Falam Union an Zanniat le Ngawn te pawl suak kio ii.

 

Falam mi ti dun napui Sim, Zahau, Laizo le Hlawn Ceu lam deuh, Laizo pon thawn nongdun deuh te heh Falam mi ti fangin amah te ai bangin awh hiam, lang hiam ngio ii. Bangdun lo phunnam tam ngai umh hmun ah kihzahdun le upatdun thiam in bawn tlang, per tlang hiamhnak umh de lo ai, a naitu caang ce umh ngio bangin Falam heh fehpui ngiohnak umh ii. Falam (Laizo) pon hmang lo phun le nam in mi nen ben lo thawn, Falam tihnak naitu sawn umh ngio hnak thawn Democracy le Federal tihnak Falam songah rin hmang thil lo ii sing.

 

Cen, Falam pon hmang Sim, Zahau, Laizo mi tam sawn ai ponkha ah Hakha thawn kontin khai per tlang thil lo, pe tlang tuh lo tihnak upa te hnen in za pha tam ngai ii.

 

5) Falam pon maw Laizo pon?

 

Group mail le calai tam sawn ai laai hlathnak te pawl le thurelhnak te pawl siik fangin Falam mi tam sawn in Laizo tihnak daih lo ai Falam ti ngio ii. Falam peng ai Laizo tlangkulh ai mi te pawl ai pon bangin hmu ngio ai Laizo tihnak mi tam sawn in lungkhim bul lo ii. Inapui Falam tihnak heh aisu te, Falam khua ai pon tihnak maw, tihnak thu zawtdun pha tampui suak thai kio ii.

 

British san lai pah Laizo pon tiin lar hnak, Kawlram acozah in rin Chin program ah Laizo tihnak heh Falam mi tam sawnin Laizo tihnak daih de lo heh poi roh ii. Cia lak songin, Falam pon ti loin Chin pon ti duh ti dungso ah Chin mi dang te pawl uk hiam le neh hiam dungin Falam in buai hiam sinsin fawn ii.

 

Ottawa (Canada) ah khai acozah ah Falam pon ti loin Chin pon ti hiam in Chin Community ah kin hnok thah ngai ii. Hakha lam in Lai pon tiin register bawn ai cia khai Falam lam in lungkhim fawn lo ii. Chin pon tihnak heh Laizo ti rori in Kawlram acozah ah ihnak bangin register tuh khai Falam lam in daih fawn lo ii.

 

Cen, Chin state ah Falam township hnakin Hakha, Thantlang, Matupi le Mindat ram khiah a kau sawn ai mi khai tam sawn ii. Falam hnak tah Hakha pon hmang mi tam sawn ii. Cia heh Falam lam in ruat hal de lo baang ii.

 

 Midang thual lo:

 

A vum ai thula fehdan hlir fangin tun ai Falam fehdan tu Falam song ah rin veksen thual lo, Chin ah khai peng dang thual tuh lo ianin cang sek ii. Tun ai Falam fehdan heh Exclusion (Midang tel lo) le Non-Cooperation Movement (Midang thawn per tlang tuh lo) rori i hang ii.

 

Hetih feh zianzo lekhaw Falam tu a khangso tuh sawn maw hnua lam ah umh thai sawn tihnak ruat pha tampui umh i hang.

Only registered users can comment.