National League for Democracy (NLD) in NLD ai camkhat member ihnak (white card) card naitu mi 20,000 vum heh party member i thilhnak an lon ii. Hetih bang ai a lonhnak tu acozah in ram miphun i thilhnak daan a bawnhnak thawn rem lo hnak umh maanin ti ii. Cia bangin party dang te khai white card nai te lon tuhin buai tlang ii.
Acozah daan thar in party ah member i tuhin Kawlram mi ihnak felfai nai te ian tel thil tuh ai Associate Citizen le Naturalized Citizen te pawl tel thil tuh lo ti ii.
Acozah daan thar in Kawlram mi ihnak ngaingai (Full Citizen) tiin a relhnak tu 1823 kum hlan ah nu le pa Kawlram ah umh zo in suakhnak te pawl ii. Associate Citizen tihnak tu 1948 Union Citizenship Law daan in Kawlrammi i te pawl ii. Naturalized Citizen tihnak tu 1948 kum January 4 nia hlan ah Kawlram ah umh zo ai 1982 hnua ah Kawlrammi ihnak ngentu te pawl ii.
Kawlram parliament in September hla ah daan remhnak bawn ai Article 4(a) le Article 10(a) in Associate Citizen le Naturalized Citizen te khai party ah tel thil tihnak heh lon in Full Citizen ian tel thil tuhin daan heh rem kio awng ii.
Kawlrammi ihnak white card nai te lak ah Rohingya Muslim tam ngai tel ai Rohingya te khai roh ngaiin rammi ihnak thula ah harsa tuh ii.
Hla hmasa ah Kawlram ai Immigration Minister Khin Yi in ram pum in white card nai heh mi 700,000-800,000 dung umh tuh tiin reel ii.
info