Canada ram ah mi zapui in hla siar acozah hnen an sumsaw ngah hlen daihnak, Basic Universal Income heh a takin nung tuhin daihnak khang sinsin ii.
Coronavirus in laivum huapin naper com sio, sumpua vak ngam lo tianin cang sio ai, bulpak in dawr le naper nai te tian in sumsaw ngah hnak tuh harsa sio i hang. Cia lakin company ham rohroh te in naper thil so ai, a lian sinsin ii. Hetin naper nai lo sumsaw luthnak nai lo te heh virus maan naper com lekhaw acozah in hla siar $2000 pe ai, cia bawmhnak neh CERB (Canada Emergency Response Benefit) tiin ko ii. CERB heh March 15, 2020 an October 3, 2020 ni tian huap ii. A ngom ah hla thum ian bawm tuhin relcat napui hla hnih bawm bet tuhin acozah in lungkhim ii.
Coronavirus maan ram pum huapin naper nai lo in tunhlan bangin tlangleng thil tuh nawn lo maan aisu khai naper nai lo hnakam hlasiar acozah hnen an sumsaw ngah thilhnak daan heh hmang pha in ruathnak khang zianzo ai, Universal Basic Income (UBI) hmang tuhin daihnak pung zianzo ii.
Universal Basic Income (UBI) heh Canada ah 1930 kum dung ah Federal ah rel awng zo ai, mi tam sawn lungkim lo hnak in hmang thil lo in umh ii. Tun kum 2020 ah Coronavirus in ram harsa maan National Democratic Party (NDP) acozah ah rel pui napui ding lai Liberal party in lungkhim lo hnak maan nung leh lo ii.
Acozah ah UBI rel thil lo napui mipui lam in a daihtu tam zianzo ai, September 19, 2020 nia ah ram pum huap in mipui daihnak lar ruai hnak lamvak nai tuhin tbu umh i hang.