Albert Sanglyen : Chin kum thar le Fanger

Albert Sanglyen : Chin kum thar le Fanger

chin new year 2013

PHURH HLUM LE THUAN KHAI FAA LE PAWL

Zanniat le Zahau-Sim Miphun hmuah ih kan thei thiam hmaisa bik mi Zanniat Cithlah Phurh Hlum le Zahau-Sim Cithlah Thuan Khai te unau hi an nau Hlawn Ceo thawn Kalemyo Kawlrawn “Sim” ram ih si’n Lairam mualsang  “Zo” hmun ah 15th. Century sungah an thawn tul. Phurh Hlum in atu Zanniat ram ah, Thuan Khai in atu Zahau-Sim ram ah ramthar an to hnu Pathian tawlrel in kan zai-pung.

Atu Phurh Hlum le Thuan Khai te thi (blood) ih peh aw mi Laidaan Nunphung le lungrual, rinsan-upat aw nak thu thukpi pi pawl hi siatbal duh mi lungput nei kan um pang maw?

  • Khua hlanpi, hlan lai ih si’n Kum 1960 tiang hrawng cu Ruun Ti ahnaar Imphal khua ah tidai an hmang thiam ve lo ruang ah Ruun Ti akau tuk ih pursum leilawn nei lem lo in kan um dah ta. Kan Pu-Pi tla cu fursung hmuah zonzai zetin lo an thlo rero ih September thla cem ah lo rawl an khawm. October thla fullmoon hrawng cu Zahau pawl in Fang-er an nunnuam lai fangah Zanniat pawl khal Dawngpui an nunnuam ve. Falam mi-le-sa adang hmuah khal acuih nunnuam nak an nei theh. Kei ce ti in an nautat aw lo,
  • Kum 1990 hnu deuh thok in Falam Pawlpi, Rangoon in Fang-er, Dawngpui, Tho, Ten reh, Khua ni, Dawngsawm ti le hming dang dang thawn Lai khua sung Falam mi-le-sa pawl tuah keel Kum khua tan tikcu hi Lai Kumthar ti hmingthar pe in hmunkhat te ah kan tuah tlang sawn pei ti thu tha kan suak ter thei tik ah U Tuang Hmung inn ah nuam zet in rawl kan ei, kan lam, hla sak kan ngai ih thu reel nak thawn kumtin kan tuah thok thei zo. Falam mi milai kan tam sin sin tikah Memorial Hall, Minye Kyawswa Rd. innpii sungah kan tuah theo. Falam mi-le-sa sungah lungrual nak, thei thiam aw nak, duhdawt aw nak, rinsan aw nak ahram pi pi pawl atho ter thei. Khua hlan Lai lam a phun phun hman kan lam thok ngam rori. Mino pawl duh daan hla tla kan ngai,
  • Cun, Kum 2001 thokin Falam mi tampi cu USA ah bur pi pi le inn sungsang te te in kan vai thok,
  • Acuih ramthar cer pawl sungih upa hrekkhat pawl cu Kum 2002 kum, Battle Creek, Michigan State ah khawm in Lai Calai thu kan reel thok tik ah Falam Pawlpi, USA din thok asi. Falam Pawlpi, USA in Chin Community of Burma, USA kan din suak tha ter thei tikah Lai Kumthar cu lungrual zet in atu tiang kumtin kan tuah suak thei lai. Lai Kumthar ahming tla Chin Kumthar ti in kan thleng ih Falam mi tampi in kan pom lai.

Asi na’n,

  • Tu lai Internet ah Chin Kumthar hi Fang-er asi ti lungput reel mi a um hlei ah Chin Kumthar, fanger puai kan tuah ti lai ah Dawngpui rak ti rero ti in Falam mi, mi Phun dang pakhat ih Laidaan nau tat ca thlah mi siar tikah khuaruah ahar ngai ngai,
  • Cun, Chin Kumthar (Fanger) ti Header (khaungsin) hming bun tla an um theo fawn.

Hivek tongkam mawi lo hngin le Header (khaungsin) pawl hi Chin Community of Burma, USA le ram dang dang ih world-wide Falam upa pawl kaih hruai in feh thok rero mi policy thawn an dang aw rori ti theih thei asi.

Chin Kumthar ti mi tongkam thar hi Falam mi, mi Phun, phun khat khat lawng te in amah lawng te co ding mi tong thar asi lo na-in!!!.

Rinsan le upat nak thawn

Albert Sanglyen

Oct. 30, 2013

(Note: www.zanniat.info in group mail lam ai upate hnen ai laai hlathnak pawl heh hnuata ah ling tlang pha tiin ruatin hetin khawlhnak ii.)

Only registered users can comment.