Kawlram acozah ai Union Election Commission in Zomi National Congress (ZNC) heh party in pom sah lo maan ZNC lam in meeting poimawh ko dun tuh dinhmun ah umh ii.
ZNC heh 1990 kum ah Chin state ai election ah Tedim le Tonzang ah seat pahnih ngah awng ai, tun ah acozah in election ah tel leh tuhin he party heh a sianglohnak san te song ah Zomi tiin hming a hmanghnak le acozah in Kawlram song mi tiin a pomhnak te song ah tel lo maan ti ii.
Union Election Commission in May hla bo tian in ZNC in ngenhnak bawn leh thil tiin thu hlup ai hming thar lang tuh in ti ii.
ZNC Chairman Pu Chin Sian Thang in, “1988 kum hnua lam ah ram a buai hnua ah kin party heh acozah in election ah lut kin siang zo hnak ii. Tun democracy dan in ramdan fehpui zianzo fangin kin tel siang leh lo ai kin covo kin khamsak tiin lang ii ing,” tiin reel ii.
Kawlram acozah in 1990 kum hnua ah Chin political party dang te thawn ZNC khai acozah in pom lo tiin thu suah awng hnak ii. ZNC heh 1988 kum ah Kawlram ah Federal acozah ding tuhin tumtah le 1990 kum election ah tel ai Pu Chin Sian Thang heh MP pakhat ah tling awnghnak ii ai ZNC ah Chairman ii.
ZNC ai MP pakhat sawn Pu Thang Lian Pau heh Zomi Re-unification/Revolutionary Organization (ZRO) ah hotu ber in Manipur, India ram ah 1990 kum hnua ah tun tian konghoi ii.
info